'കല്ല് പിഴുതാല്‍ വിവരമറിയും' ; കെ - റെയിൽ വിരുദ്ധ സമരത്തിന് പിന്നിൽ തീവ്രവാദ സംഘടനകളെന്ന് സജി ചെറിയാൻ

പ്രതിഷേധക്കാരെ കാര്യങ്ങൾ പറഞ്ഞ് ബോധ്യപ്പെടുത്തും, അതിനുള്ള പ്രവർത്തനങ്ങൾ നടന്നുവരികയാണെന്ന് മന്ത്രി സജി ചെറിയാന്‍

ആലപ്പുഴ : കെ-റെയിൽ പദ്ധതിക്കെതിരായി കേരളത്തിലുടനീളം നടക്കുന്ന പ്രതിഷേധങ്ങൾക്കും സമരങ്ങൾക്കും പിന്നിൽ തീവ്രവാദസംഘടനകളാണെന്ന് സജി ചെറിയാൻ. പണം ഉൾപ്പടെ ഇറക്കി ജനങ്ങളെ തെറ്റിദ്ധരിപ്പിച്ച് സർക്കാരിനെതിരെ തിരിക്കുകയാണ്.

കല്ല് ഊരിയാൽ വിവരമറിയും, ഒരു സംശയവും അക്കാര്യത്തിലില്ല. പ്രതിഷേധക്കാരെ കാര്യങ്ങൾ പറഞ്ഞ് ബോധ്യപ്പെടുത്തും. അതിനുള്ള പ്രവർത്തനങ്ങൾ നടന്നുവരികയാണ്. ജനങ്ങളുടെ എല്ലാവിധ ആശങ്കകളും പരിഹരിക്കുമെന്നും മന്ത്രി പറഞ്ഞു.

പണ്ട് വൈദ്യുതി ലൈൻ വന്നപ്പോഴും ചിലർ അതിനെതിരെ പ്രതിഷേധം സംഘടിപ്പിച്ചു. എന്നിട്ട് ഈ നാട്ടിൽ വികസനം വരാതെയിരുന്നോ എന്നും മന്ത്രി ചോദിച്ചു. കെ-റെയിൽ വിരുദ്ധ സമരത്തിലൂടെ തിരിച്ചുവരാനുള്ള കോൺഗ്രസ് ശ്രമം നടക്കില്ല.

ദേശീയപാത വികസനത്തിൽ ഉൾപ്പടെ എൽ.ഡി.എഫ് സർക്കാർ പറഞ്ഞ വാക്ക് പാലിച്ചു. കെ-റെയിൽ പദ്ധതി നടപ്പാക്കും എന്നത് കേരളത്തിലെ ജനങ്ങൾക്ക് സർക്കാർ നൽകിയ ഉറപ്പാണ്. അത് തീർച്ചയായും പാലിക്കപ്പെടുമെന്നും മന്ത്രി വ്യക്തമാക്കി.