രഞ്ജിത്ത് ശ്രീനിവാസന്‍ വധം ; നാല് എസ്‌ഡിപിഐ പ്രവർത്തകർ കൂടി അറസ്റ്റിൽ

കൊലപാതക സംഘത്തിൽ ഉൾപ്പെട്ട ആലപ്പുഴ സ്വദേശികളായ രണ്ടുപേരടക്കം അറസ്റ്റില്‍

ആലപ്പുഴ : ഒബിസി മോർച്ച സംസ്ഥാന സെക്രട്ടറി അഡ്വ.രഞ്ജിത്ത് ശ്രീനിവാസന്‍റെ കൊലപാതകത്തിൽ നാല്​​ പേര്‍ കൂടി അറസ്റ്റിൽ. പിടിയിലായവർ നാലുപേരും എസ്‌ഡിപിഐ പ്രവർത്തകരാണ്. ഇവരിൽ രണ്ട് പേർ കൊലപാതകത്തിൽ നേരിട്ട് പങ്കെടുത്തവരും രണ്ടുപേർ പ്രതികൾക്ക് ആവശ്യമായ സഹായങ്ങൾ ചെയ്‌ത് നൽകിയവരുമാണ്.

കൊലപാതക സംഘത്തിൽ ഉൾപ്പെട്ട ആലപ്പുഴ സ്വദേശികളായ രണ്ടുപേരെയും ഗൂഢാലോചനയിൽ പങ്കാളിയായ വലിയമരം വാർഡ്​ പുന്നക്കൽ പുരയിടം സെയ്‌ഫുദ്ദീൻ(48), പ്രതികൾക്ക്​ വ്യാജ സിം കാർഡ്​ തരപ്പെടുത്തിയ പുന്നപ്ര കളിത്തട്ടിനു സമീപം ബി ആൻഡ്​ ബി മൊബൈൽ കട നടത്തുന്ന പുന്നപ്ര സൗത്ത്​ വലിയപറമ്പ്​ മുഹമ്മദ് ബാദുഷ(27) എന്നിവരെയുമാണ്​​ പൊലീസ്​ അറസ്റ്റ്​ ചെയ്‌തത്​.

മറ്റ്​ ജില്ലയിൽ ഒളിവിൽ കഴിയവെയാണ് ഇവര്‍ പിടിയിലായത്. കേസ് അന്വേഷണത്തെ ബാധിക്കുമെന്നതിനാൽ കുറ്റകൃത്യത്തിൽ നേരിട്ട്​ പങ്കെടുത്ത പ്രതികളുടെ പേരും മേൽവിലാസവും വെളിപ്പെടുത്താൻ കഴിയില്ലെന്ന്​ പൊലീസ്​ പറഞ്ഞു.

ബാദുഷ കടയിൽ സിം കാർഡ് എടുക്കാൻ വന്നയാളുടെ ആധാർ കാർഡും ഫോട്ടോയും ഉപയോഗിച്ച് അവരറിയാതെ രണ്ട്​ സിം കാർഡുകൾ എടുത്തു. ഇതില്‍ ഒന്ന് രഞ്ജിത്ത് വധക്കേസുമായി ബന്ധമുണ്ടെന്ന് സംശയിക്കുന്ന പ്രതികൾക്ക് നൽകുകയുമായിരുന്നു. ഇതുമായി ബന്ധപ്പെട്ട് പുന്നപ്ര പൊലീസ് ബാദുഷക്കെതിരെ വ്യാജരേഖ ചമച്ച് വിശ്വാസ വഞ്ചന നടത്തിയതിന് കേസെടുത്തിട്ടുണ്ട്​.

ഇവരെ മജിസ്‌ട്രേറ്റിന് മുന്നിൽ ഹാജരാക്കി റിമാൻഡ് ചെയ്യും. ഇപ്പോൾ പിടിയിലായവരെ ചോദ്യം ചെയ്യുന്നതോടെ കൊലപാതകവും ഗൂഢാലോചനയുമായി ബന്ധപ്പെട്ട കേസുകളിൽ വരും ദിവസങ്ങളിൽ കൂടുതൽ പേരെ പിടികൂടാൻ സാധിക്കുമെന്നാണ് അന്വേഷണ സംഘം പ്രതീക്ഷിക്കുന്നത്.