ആലപ്പുഴ: മസ്‌ജിദ് അങ്കണത്തില്‍ ഹിന്ദു ആചാരപ്രകാരമുള്ള വിവാഹത്തിന് അവസരം ഒരുക്കിയതിന് ആശംസയുമായി മുഖ്യമന്ത്രി പിണറായി വിജയന്‍. കായംകുളം ചേരാവള്ളിയിലെ മുസ്ലിം ജമാഅത്ത് പള്ളി അങ്കണത്തിലായിരുന്നു വിവാഹം. ചേരാവള്ളി സ്വദേശിനി അമൃതാഞ്ജലിയില്‍ അഞ്ജുവും തെക്കേടത്ത് തറയിൽ ശരതുമാണ് വിവാഹിതരായത്. വിവാഹ ചിത്രം തന്‍റെ ഫേസ്ബുക്ക് പേജിൽ പങ്കുവച്ചുകൊണ്ടാണ് മുഖ്യമന്ത്രി ആശംസ നേർന്നത്. മതത്തിന്‍റെ പേരിൽ മനുഷ്യരെ ഭിന്നിപ്പിക്കാൻ ആസൂത്രിത ശ്രമം നടക്കുന്ന സമയത്താണ് ആ വേലിക്കെട്ടുകൾ തകർത്തുകൊണ്ട് മുന്നേറി ഇവർ നാടിനാകെ പ്രചോദനമാകുന്നതെന്ന് മുഖ്യമന്ത്രി പോസ്റ്റില്‍ പറഞ്ഞു. ഇതിനകം രാജ്യത്തിന്‍റെ വിവിധയിടങ്ങളിലുള്ളവര്‍ സാമൂഹ്യ മാധ്യമങ്ങളിലൂടെ വധൂവരന്മാർക്ക് ഇതിനകം ആശംസകൾ നേർന്നു.
മുഖ്യമന്ത്രിയുടെ ഫേസ്ബുക്ക് പോസ്റ്റ് മുഖ്യമന്ത്രിയുടെ ഫേസ്ബുക്ക് പോസ്റ്റിന്‍റെ പൂർണരൂപം:
"മതസാഹോദര്യത്തിന്‍റെ മനോഹരമായ മാതൃകകൾ കേരളം എക്കാലത്തും ഉയർത്തിപ്പിടിച്ചിട്ടുണ്ട്. ആ ചരിത്രത്തിലെ പുതിയൊരേടാണ് ഇന്ന് ചേരാവള്ളിയിൽ രചിക്കപ്പെട്ടത്. ചേരാവള്ളി മുസ്ലീം ജമാഅത്ത് പള്ളിയിൽ തയ്യാറാക്കിയ കതിർ മണ്ഡപത്തിൽ ചേരാവള്ളി അമൃതാഞ്ജലിയിൽ ബിന്ദുവിന്‍റെയും പരേതനായ അശോകന്‍റെയും മകൾ അഞ്ജുവും കൃഷ്ണപുരം കാപ്പിൽ കിഴക്ക് തോട്ടേതെക്കടത്ത് തറയിൽ ശശിധരന്‍റെയും മിനിയുടേയും മകൻ ശരത്തും വിവാഹിതരായി.
ഭർത്താവിന്‍റെ മരണത്തെത്തുടർന്ന് സാമ്പത്തിക പ്രതിസന്ധിയിൽ അകപ്പെട്ട ബിന്ദു മകളുടെ വിവാഹത്തിനായി പള്ളിക്കമ്മിറ്റിയുടെ സഹായം തേടുകയും, അവർ സന്തോഷപൂർവ്വം അത് ഏറ്റെടുക്കുകയും ചെയ്‌തു. മതത്തിന്‍റെ പേരിൽ മനുഷ്യരെ ഭിന്നിപ്പിക്കാൻ ആസൂത്രിത ശ്രമം നടക്കുന്ന സമയത്താണ് ആ വേലിക്കെട്ടുകൾ തകർത്തുകൊണ്ട് മുന്നേറാൻ ഇവർ നാടിനാകെ പ്രചോദനമാകുന്നത്. വധൂവരൻമാർക്കും കുടുംബാംഗങ്ങൾക്കും പള്ളി കമ്മിറ്റിക്കും ഇതിനായി പ്രവർത്തിച്ച എല്ലാവർക്കും ആശംസകൾ നേരുന്നു. കേരളം ഒന്നാണ്; നമ്മൾ ഒറ്റക്കെട്ടാണ് എന്ന് കൂടുതൽ ഉച്ചത്തിൽ നമുക്ക് പറയാം - ഈ സുമനസുകൾക്കൊപ്പം."
