ആലപ്പുഴ ബൈപ്പാസ് ഉദ്ഘാടനം; ജനപ്രതിനിധികളെ ഒഴിവാക്കിയത് മര്യാദകേടെന്ന് കെസി വേണുഗോപാൽ എംപി

പദ്ധതിയുടെ മുഴുവൻ ക്രെഡിറ്റും തങ്ങൾക്ക് കൈക്കലാക്കമെന്നത് വെറും വ്യാമോഹമാണെന്നും ആലപ്പുഴയിലെ ജനങ്ങളെ വിഡ്ഢികളാക്കാൻ സാധിക്കില്ലെന്നും വേണുഗോപാൽ ചൂണ്ടിക്കാട്ടി.

ആലപ്പുഴ: ആലപ്പുഴ ബൈപ്പാസിന്‍റെ ഉദ്‌ഘാടനത്തിൽ നിന്നും ജനപ്രതിനിധികളെ ഒഴിവാക്കിയ നടപടി എല്ലാ കീഴ്‌വഴക്കങ്ങളെയും ജനാധിപത്യ മര്യാദകളെയും കാറ്റിൽ പറത്തുന്നതാണെന്ന് കെ സി വേണുഗോപാൽ എംപി. ബൈപാസ് നിർമ്മാണം സാക്ഷാത്കരിക്കാനും പൂർത്തീകരിക്കാനും താൻ നടത്തിയ ഇടപെടലുകൾ ആലപ്പുഴയിലെ ജനങ്ങൾക്കറിയാം. ദേശീയ പാത വികസനം ഉൾപ്പെടുന്ന ഉപരിതല മന്ത്രാലയത്തിന്‍റെ സ്റ്റാൻഡിങ് കമ്മിറ്റി അംഗം കൂടിയായ തന്‍റെ ഇക്കാലം വരെയുള്ള ഇടപെടലുകൾ പൊതുമരാമത്തു വകുപ്പിന്‍റെ ഫയലുകൾ പരിശോധിച്ചാൽ മനസിലാവും. അത് പരിശോധിച്ചിട്ട് താനുൾപ്പെടുന്ന ജനപ്രതിനിധികൾക്ക് ഒരു പങ്കുമില്ലെന്ന് പറഞ്ഞാൽ പരസ്യ സംവാദത്തിന് തയ്യാറാണെന്നും വേണുഗോപാൽ വ്യക്തമാക്കി. ഇക്കാര്യത്തിൽ വ്യക്തിപരമായ ആക്ഷേപങ്ങൾക്കോ അവകാശവാദങ്ങൾക്കോ താനില്ലെന്നും എന്നാൽ ഈ വിഷയത്തെ ആദർശപരമായി തന്നെ അഭിമുഖീകരിക്കുമെന്നും വേണുഗോപാൽ പറഞ്ഞു.

ഉമ്മൻ‌ചാണ്ടി സർക്കാരിന്‍റെ കാലത്ത് ബൈപ്പാസിന്‍റെ തറക്കല്ലിടൽ ചടങ്ങിലേക്ക് കേന്ദ്ര മന്ത്രി നിതിൻ ഗഡ്‌കരിയെയും സിപിഎമ്മിന്‍റെ രണ്ട് എംഎൽഎമാരെയും ക്ഷണിച്ചിരുന്നതാണ്. എന്നാൽ ചടങ്ങ് സിപിഎം, എംഎൽമാർ ബഹിഷ്‌കരിക്കുകയാണുണ്ടായത്. പദ്ധതിയുടെ മുഴുവൻ ക്രെഡിറ്റും തങ്ങൾക്ക് കൈക്കലാക്കമെന്നത് വെറും വ്യാമോഹമാണെന്നും ആലപ്പുഴയിലെ ജനങ്ങളെ വിഡ്ഢികളാക്കാൻ സാധിക്കില്ലെന്നും വേണുഗോപാൽ ചൂണ്ടിക്കാട്ടി. മണ്ഡലം ഉൾകൊള്ളുന്ന സ്ഥലത്തെ എംപി, ധനകാര്യ മന്ത്രി കൂടിയായ എംഎൽഎ എന്നിവരെപോലും ഒഴിവാക്കിയത് കേന്ദ്ര സർക്കാർ നിർദേശം മൂലമാണെന്ന് പറയുന്നത് എന്തടിസ്ഥാനത്തിലാണെന്ന് മനസിലാവുന്നില്ല.

പ്രധാനമന്ത്രി പോലും പങ്കെടുക്കാത്ത കേന്ദ്ര മന്ത്രി വീഡിയോ കോൺഫറൻസ് വഴി ഉദ്ഘാടനം ചെയ്യുന്ന പരിപാടിക്ക് ജനപ്രതിനിധികളെ ക്ഷണിക്കാത്തത് ജനാധിപത്യ സംവിധാനത്തിന് തന്നെ അവമതിപ്പുണ്ടാക്കുന്നതാണ്. ജനപ്രതിനിധികളെ ഒഴിവാക്കണമെന്ന നിർദേശം ആരു നൽകിയെന്നുള്ളതിനുള്ള ഉത്തരം കേന്ദ്ര സർക്കാരിൽ നിന്ന് തന്നെ തേടുമെന്നും കെ സി വേണുഗോപാൽ എംപി പറഞ്ഞു