ആലപ്പുഴ: ആലപ്പുഴ കണ്ട ഏറ്റവും വലിയ കുംഭ കോണമാണ് ആലപ്പുഴ യൂഡിസ്‌മാറ്റ് കുടിവെള്ള പദ്ധതിയിലെ അഴിമതിയെന്ന് ഡിസിസി പ്രസിഡന്‍റ് എം. ലിജു ആരോപിച്ചു. ആലപ്പുഴ കുടിവെള്ള പദ്ധതിയിലെ അഴിമതി സമഗ്രമായി അന്വേഷിക്കണമെന്നാവശ്യപെട്ട് ആലപ്പുഴ സൗത്ത്,നോർത്ത് ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ ജല വിഭവ വകുപ്പ് എക്‌സിക്യൂട്ടീവ് എഞ്ചിനീയറുടെ ഓഫീസിലേക്ക് നടത്തിയ മാർച്ച് ഉദ്ഘാടനം ചെയ്‌ത് സംസാരിക്കുകയായിരുന്നു അദ്ദേഹം.
കുടിവെള്ള പദ്ധതി അഴിമതി സി.ബിഐ അന്വേഷിക്കണമെന്ന് ഡിസിസി പ്രസിഡന്‍റ് 214 കോടി രൂപ ചെലവഴിച്ച് നടപ്പിലാക്കിയ പദ്ധതിയിൽ 44 തവണയാണ് നിലവാരമില്ലാത്ത പൈപ്പ് ഉപയോഗിച്ചത് മൂലവും പൈപ്പിടുന്നതിലെ നടപടിക്രമങ്ങൾ പാലിക്കാത്തത് മൂലവും പൈപ്പ് പൊട്ടിയത്. 2005 മുതൽ 2015 വരെ തുടർച്ചയായി നഗരസഭാ ഭരണത്തിലുണ്ടായിരുന്ന ഇടതുമുന്നണിയുടെ നേതൃത്വത്തിലുള്ള ആലപ്പുഴ നഗരസഭ ഭരണ സമിതിയുടെ കാലത്താണ് ആലപ്പുഴ യൂഡിസ്‌മാറ്റ് കുടിവെള്ള പദ്ധതി നടപ്പിലാക്കിയത്. സിബിഐ അന്വേഷണം നടത്തിയാൽ അന്നത്തെ നഗരസഭയിലെ സിപിഎം ഭരണ നേതൃത്വത്തിനുള്ള പങ്ക് വ്യക്തമാകുമെന്നും എം ലിജു പറഞ്ഞു.
നടപടി ക്രമങ്ങൾ പാലിക്കാതെ പ്രതിപക്ഷത്തിന്‍റെ വിയോജനകുറിപ്പോടെയാണ് അന്നത്തെ നഗരസഭാ ഭരണ സമിതി തീരുമാനങ്ങൾ എടുത്തതെന്ന് രേഖകൾ പരിശോധിച്ചാൽ മനസിലാക്കാൻ സാധിക്കും. ആലപ്പുഴയിൽ നിന്നുള്ള മന്ത്രിമാരായ തോമസ് ഐസക്കിനും ജി. സുധാകരനും ആത്മാർത്ഥതയുണ്ടെങ്കിൽ ആലപ്പുഴ കുടിവെള്ള പദ്ധതിയിലെ കരാറുകാരെ കരിമ്പട്ടികയിൽ ഉൾപ്പെടുത്താൻ തയ്യാറാകണമെന്നും ലിജു പറഞ്ഞു.കരാറുകാരനെ സംരക്ഷിക്കാനാണ് ഇടതു സർക്കാർ ഉദ്യോഗസ്ഥരെ സസ്‌പെൻഡ് ചെയ്‌തിരിക്കുന്നത്. ഉദ്യോഗസ്ഥരും രാഷ്‌ട്രീയ നേതാക്കളും കരാറുകാരും തമ്മിൽ നടത്തിയ സാമ്പത്തിക ഇടപാടുകൾ ഉൾപെടെ സിബിഐ അന്വേഷിക്കണമെന്നും എം ലിജു ആവശ്യപെട്ടു.
ജല വിഭവ വകുപ്പ് എക്‌സിക്യൂട്ടീവ് എഞ്ചിനീയറുടെ ഓഫീസിലേക്ക് പ്രതിക്ഷേധവുമായി എത്തിയ പ്രവർത്തകർ ജല വിഭവ വകുപ് എഞ്ചിനീയറുടെ ഓഫീസിലേക്ക് തള്ളിക്കയറാൻ ശ്രമിച്ചത് പൊലീസുമായുള്ള സംഘർഷത്തിൽ കലാശിച്ചു. ഡിസിസി പ്രസിഡന്‍റ് എം. ലിജു, മുൻസിപ്പൽ ചെയർമാൻ ഇല്ലിക്കൽ കുഞ്ഞുമോൻ ഉൾപ്പടെയുള്ളവരെ പൊലീസ് അറസ്റ്റ് ചെയ്‌തശേഷം വിട്ടയച്ചു.
