പ്രവാസി ചിട്ടിയിലും അഴിമതി; ധനമന്ത്രിയുടെ പങ്ക് അന്വേഷിക്കണമെന്ന് കെ.സുരേന്ദ്രൻ

വിശദമായ അന്വേഷണം വേണമെന്നാണ് ബിജെപി സംസ്ഥാന അധ്യക്ഷൻ ആവശ്യപ്പെട്ടത്.

ആലപ്പുഴ : സംസ്ഥാനത്ത് കെഎസ്എഫ്ഇ ചിട്ടിതട്ടിപ്പ് വ്യാപകമായ രീതിയിൽ നടന്നിട്ടുണ്ടെന്നും ഇതിന് പുറമെ പ്രവാസി ചിട്ടിയിലും അഴിമതിയുണ്ടെന്നും ബിജെപി സംസ്ഥാന പ്രസിഡന്‍റ് കെ സുരേന്ദ്രൻ.

ധനമന്ത്രിയുടെ എല്ലാ ഇടപാടുകളിലും അഴിമതി നടത്തുന്നിട്ടുണ്ടെന്നും തന്‍റെ വകുപ്പിനെ ഉപയോഗിച്ച് അഴിമതിക്ക് കളമൊരുക്കുകയാണ് തോമസ് ഐസക് ചെയ്യുന്നതെന്നും അദ്ദേഹം ആരോപിച്ചു.

കെഎസ്എഫ്ഇ ചിട്ടി തട്ടിപ്പിൽ ധനമന്ത്രി വെപ്രാളം കാണിക്കുന്നത് സർക്കാർ അറിഞ്ഞുള്ള അഴിമതിയാണെന്നും ധനമന്ത്രിക്ക് വിജിലൻസ് അന്വേഷണത്തെ ഭയമാണ് എന്നുള്ളതിന് തെളിവാണ് വിജിലൻസിനെ രൂക്ഷമായ ഭാഷയിൽ വിമർശിക്കുന്നതെന്നും കെ.സുരേന്ദ്രൻ പറഞ്ഞു.

കിഫ്ബിയിലും കെഎസ്എഫ്ഇ ചിട്ടിയിലും പ്രവാസി ചിട്ടിയിലും വ്യാപകമായ അഴിമതി നടന്നിട്ടുണ്ടെന്നും കെഎസ്എഫ്ഇ ചിട്ടി തട്ടിപ്പിലെ എല്ലാ വിവരങ്ങളും സർക്കാർ പുറത്ത് വിടണമെന്നും വിഷയത്തിൽ വിശദമായ അന്വേഷണം വേണമെന്നും ബിജെപി സംസ്ഥാന അധ്യക്ഷൻ ആവശ്യപ്പെട്ടു.