ആലപ്പുഴ:ചേർത്തല നഗരത്തിലെത്തിയാല്‍ മൂത്രശങ്ക അകറ്റാൻ എന്തു ചെയ്യണമെന്നറിയാത്ത സ്ഥിതിയാണ് ഇപ്പോൾ. നേരത്തെ ഉണ്ടായിരുന്ന ടോയ്‌ലറ്റുകൾ പൊളിച്ചുമാറ്റി ഇ- ടോയ്‌ലറ്റുകൾ സ്ഥാപിച്ചപ്പോൾ ചേർത്തല നഗരം അത്യാധുനികതയുടെ ലോകത്തേക്ക് കുതിക്കുകയാണെന്ന് നഗരവാസികൾ വിശ്വസിച്ചു. എന്നാല്‍ ഇ- ടോയ്‌ലറ്റുകൾ ഉപയോഗശൂന്യമായതോടെ നഗരത്തില്‍ മൂത്രമൊഴിക്കാൻ പൊതു സ്ഥലം തേടേണ്ട സ്ഥിതിയായി.
വികസനത്തിൻ്റെ തിരുശേഷിപ്പുകളായി ഇ-ടോയ്ലറ്റ് ; പത്ത് വർഷമായി ഉപയോഗശൂന്യം
കെ.സി വേണുഗോപാൽ എം.പി ആയിരുന്ന സമയത്ത് അനുവദിച്ച പത്ത് ലക്ഷം രൂപയും, നഗരസഭയുടെ നാല് ലക്ഷവും വിനിയോഗിച്ചാണ് ചേർത്തല കെ.എസ്.ആർ.ടി.സി ബസ് സ്റ്റാൻഡിന് സമീപത്തെ ഷോപ്പിങ് കോംപ്ലക്സ് പരിസരത്തും പ്രൈവറ്റ് ബസ് സ്റ്റാൻഡിലും പാരഡൈസ് തിയേറ്ററിന് മുൻവശത്തും ഇ-ടോയ്ലറ്റ് സംവിധാനം സ്ഥാപിച്ചത്. ഒരു രൂപ നാണയമിട്ട് ഉപയോഗിക്കാവുന്ന നിലയിലാണ് ഇവ സജ്ജമാക്കിയത്.