ആലപ്പുഴ : എഐഎസ്എഫ് സംസ്ഥാന സമ്മേളനത്തില്‍ എസ്‌എഫ്ഐക്ക് രൂക്ഷവിമര്‍ശനം. പൊതുചര്‍ച്ചയില്‍ കടുത്ത ഭാഷയിലാണ് പ്രതിനിധികള്‍ ഇടത് സംഘടനയെ ആക്രമിച്ചത്. മുന്നണി മര്യാദ പോലും പാലിക്കാതെയാണ് പല കോളേജുകളിലും എസ്‌എഫ്ഐ പ്രവര്‍ത്തിക്കുന്നതെന്നും പ്രവര്‍ത്തകര്‍ ചൂണ്ടിക്കാട്ടി.
കൊടിയിലെ ജനാധിപത്യവും പ്രസംഗത്തിലെ സോഷ്യലിസവും പ്രവർത്തിയിലും ക്യാമ്പസുകളിലും കാണുന്നില്ല. പലയിടങ്ങളിലും ആർഎസ്എസിനെ പോലെയാണ് എസ്എഫ്‌ഐക്കാർ പെരുമാറുന്നതെന്ന് കോട്ടയം, എറണാകുളം ജില്ലയിലെ പ്രതിനിധികള്‍ പറഞ്ഞു. മറ്റ് വിദ്യാർത്ഥി സംഘടനകൾക്ക് ക്യാമ്പസുകളിൽ സ്വതന്ത്രമായി പ്രവര്‍ത്തിക്കാന്‍ സാഹചര്യം ഒരുക്കാത്ത ഇടങ്ങളിൽ വർഗീയ ശക്തികളും മയക്കുമരുന്ന് മാഫിയകളും കടന്നുവരുന്നത് എസ്എഫ്‌ഐക്കാർ മനസിലാക്കണം എന്നും സമ്മേളനത്തില്‍ വിമർശനം ഉയർന്നു.