ടോക്കിയോ: ഒളിമ്പിക് ഹോക്കിയില്‍ നാല് പതിറ്റാണ്ടുകള്‍ക്ക് ശേഷമുള്ള മെഡല്‍ നേട്ടം കൊവിഡ് പോരാളികള്‍ക്ക് സമര്‍പ്പിക്കുന്നതായി ഇന്ത്യന്‍ ക്യാപ്റ്റന്‍ മന്‍പ്രീത് സിങ്. മത്സരത്തിന് പിന്നാലെ നടന്ന മാധ്യമങ്ങളുമായുള്ള കൂടിക്കാഴ്ചയ്ക്കിടെയാണ് വികാരാധീനനായ 29കാരന്‍ ഇക്കാര്യം പറഞ്ഞത്.
' ഈ സമയം എന്ത് പറയണമെന്ന് എനിക്കറിയില്ല. അത് അതിശയകരമായിരുന്നു. 3-1ന് പിന്നിട്ടു നിന്നതിന് പിന്നാലെയാണ് ഞങ്ങള്‍ മത്സരത്തിലേക്ക് തിരിച്ച് വന്നത്. ഈ മെഡലിന് ഞങ്ങള്‍ അര്‍ഹരാണെന്നാണ് എനിക്ക് തോന്നുന്നത്. ഞങ്ങള്‍ കഠിനാധ്വാനം ചെയ്തിരുന്നു. കഴിഞ്ഞ 15 മാസങ്ങള്‍ ഞങ്ങളെ സംബന്ധിച്ച് ബുദ്ധിമുട്ടേറിയതായിരുന്നു.
ഇതിനിടെ പല താരങ്ങള്‍ക്കും കൊവിഡ് ബാധിച്ചു. ഈ വിജയം ഇന്ത്യയിൽ ധാരാളം ജീവനുകള്‍ രക്ഷിച്ച ഡോക്ടർമാർക്കും മുൻനിര ആരോഗ്യ പ്രവർത്തകർക്കും സമർപ്പിക്കാൻ ഞങ്ങൾ ആഗ്രഹിക്കുന്നു'. ഇന്ത്യന്‍ ക്യാപ്റ്റന്‍ പറഞ്ഞു. അതേസമയം വെങ്കല മെഡലിനായുള്ള ആവേശപ്പോരാട്ടത്തില്‍ നാലിനെതിരേ അഞ്ചുഗോളുകള്‍ക്കാണ് ഇന്ത്യ ജര്‍മനിയെ കീഴടക്കിയത്.