ടോക്കിയോ : ഒളിമ്പിക്സ് ഷൂട്ടിങിൽ ഇന്ത്യയ്ക്ക് വീണ്ടും നിരാശ. പത്ത് മീറ്റർ എയർ പിസ്റ്റൾ വിഭാഗത്തിന് പിന്നാലെ പത്ത് മീറ്റർ റൈഫിൾ വിഭാഗത്തിലും ഇന്ത്യൻ മിക്‌സഡ് ടീമിന് ഫൈനൽ യോഗ്യത നേടാനായില്ല. രണ്ട് ടീമുകളാണ് ഇന്ത്യക്കായി യോഗ്യത റൗണ്ടിൽ മത്സരിച്ചത്.
യോഗ്യത റൗണ്ടിൽ മൂന്ന് സീരീസുകളിലായി ദിവ്യാൻഷ് പൻവാർ-എലവേനിൽ വാലരിവൻ സഖ്യം 626.5 പോയിന്‍റാണ് നേടിയത്. 12-ാം സ്ഥാനത്താണ് ഇരുവരും മത്സരം അവസാനിപ്പിച്ചത്. മറ്റൊരു ഇന്ത്യൻ സഖ്യം ദീപക് കുമാറും അഞ്ജും മൗഡ്‌ഗിലും 18-ാം സ്ഥാനത്താണ് ഫിനിഷ് ചെയ്തത്. 623.8 പോയിന്‍റായിരുന്നു ഇവർ നേടിയത്.
633 പോയിന്‍റുമായി ചൈനയുടെ ക്വിൻ യാങ്-ഹൗറാൻ യാങ് സഖ്യമാണ് ഒന്നാമതെത്തിയത്. പട്ടികയിലെ ആദ്യ രണ്ട് സ്ഥാനക്കാര്‍ സ്വർണ മെഡലിനായും മൂന്നും നാലും സ്ഥാനക്കാര്‍ വെങ്കല മെഡലിനായും മത്സരിക്കും.