ടോക്കിയോ: ഒളിമ്പിക് ചരിത്രത്തില്‍ ഏറ്റവും കൂടുതല്‍ മെഡല്‍ നേട്ടവുമായാണ് ഇക്കുറി ഇന്ത്യന്‍ സംഘം ടോക്കിയോയില്‍ നിന്നും മടങ്ങുക. 2012ലെ ലണ്ടന്‍ ഒളിമ്പിക്സിലെ ആറ് മെഡലുകള്‍ എന്ന റെക്കോര്‍ഡാണ് ഇക്കുറി ഇന്ത്യ പഴങ്കഥയാക്കിയത്. ലണ്ടനില്‍ രണ്ട് വെള്ളിയും നാല് വെങ്കലവുമുള്‍പ്പെടെ ആറ് മെഡലുകളായിരുന്നു ഇന്ത്യയുടെ അക്കൗണ്ടിലുണ്ടായിരുന്നു. എന്നാല്‍ ഇതേവരെ ഒരു സ്വര്‍ണവും രണ്ട് വെള്ളിയും നാല് വെങ്കലവുമുള്‍പ്പെടെ ഏഴ് മെഡലുകള്‍ ഇന്ത്യ സ്വന്തമാക്കിയിട്ടുണ്ട്.
ഇതിന് പുറിമെ ജാവലിന്‍ താരം നീരജ് ചോപ്രയിലൂടെ ഒളിമ്പിക് അത്‌ലറ്റിക്സിലെ ആദ്യ മെഡല്‍ നേട്ടവും രാജ്യം ആഘോഷിച്ചു. ടോക്കിയോയില്‍ 87.03 മീറ്റര്‍ ദൂരം എറിഞ്ഞാണ് നീരജ് 'സുവര്‍ണ' ചരിത്രം കുറിച്ചത്. നീരജിന് പുറമെ മീരാബായ് ചാനു (വെയ്‌റ്റ് ലിഫ്റ്റിങ്- വെള്ളി), രവികുമാര്‍ ദഹിയ (ഗുസ്തി- വെള്ളി), ബജ്‌റംഗ് പുനിയ (ഗുസ്തി-വെങ്കലം), പിവി സിന്ധു (ബാഡ്മിന്‍റണ്‍- വെങ്കലം), ലവ്‌ലിന ബോര്‍ഗോഹെയ്‌ന്‍ (ബോക്സിങ്- വെങ്കലം), പുരുഷ ഹോക്കി ടീം(വെങ്കലം) എന്നിവരാണ് ഇന്ത്യയ്ക്കായി മെഡല്‍ നേടിയത്.