ന്യൂയോർക്ക് : കഴിഞ്ഞ ദിവസത്തിന് സമാനമായി യു.എസ് ഓപ്പണിൽ വമ്പൻ അട്ടിമറികൾ തുടരുന്നു. ലോക ഒന്നാം നമ്പര്‍ വനിതാതാരം ആഷ്‌ലി ബാര്‍ട്ടിയും, പുരുഷ വിഭാഗത്തിലെ ലോക ഏഴാം നമ്പര്‍ താരം ഷാപ്പലോവിനുമാണ് അടിതെറ്റിയത്.
ഇന്നലെ പുറത്തായ നിലവിലെ ചാമ്പ്യന്‍ നവോമി ഒസാക്കയ്ക്ക് പിന്നാലെയാണ് ആഷ്‌ലി ബാര്‍ട്ടിയും യു.എസ്.ഓപ്പണില്‍ നിന്ന് പുറത്തായത്. അമേരിക്കയുടെ ഷെൽബി റോജേഴ്‌സാണ് ബാര്‍ട്ടിയെ അട്ടിമറിച്ചത്. വിജയത്തോടെ റോജേഴ്‌സ് പ്രീ ക്വാർട്ടറിലേക്ക് മുന്നേറി.
മൂന്ന് സെറ്റ് നീണ്ട പോരാട്ടത്തിൽ 6-2, 1-6, 7-6 എന്ന സ്കോറിനാണ് അമേരിക്കൻ താരത്തിന്റെ വിജയം. ആദ്യ സെറ്റ് റോജേഴ്‌സും രണ്ടാം സെറ്റ് ബാർട്ടിയും നേടി. മൂന്നാം സെറ്റിൽ ഇരുവരും തുല്യത പാലിച്ചതോടെ മത്സരം ടൈബ്രേക്കറിലേക്ക് നീങ്ങി. എന്നാൽ ടൈബ്രേക്കറിൽ 7-5 എന്ന സ്കോറിന് ബാർട്ടിയെ തകർത്ത് റോജേഴ്‌സ് വിജയം നേടുകയായിരുന്നു.