എടിപി ഫൈനല്‍സ്: റാഫേല്‍ നദാല്‍ സെമിയില്‍

റഷ്യൻ താരം ഡാനില്‍ മെദ്‌വദേവിനെയാണ് എടിപി ഫൈനല്‍സിന്‍റെ സെമിയില്‍ നദാല്‍ നേരിടുന്നത്.

ലണ്ടൻ: ലോക രണ്ടാം നമ്പർ താരം റാഫേല്‍ നദാല്‍ എടിപി ഫൈനല്‍സിന്‍റെ സെമി ഫൈനലില്‍ കടന്നു. നിലവിലെ ചാമ്പ്യൻ സ്റ്റെഫാനോസ് സിറ്റ്‌സിപാസിനെ തോല്‍പ്പിച്ചാണ് നദാല്‍ സെമിയില്‍ കടന്നത്.

6-4, 4-6, 6-2 എന്നീ സ്‌കോറിനാണ് നദാലിന്‍റെ ജയം. ഇത് ആറാം തവണയാണ് നദാല്‍ എടിപി ഫൈനല്‍സിന്‍റെ സെമിയില്‍ കടക്കുന്നത്. 2019 യുഎസ് ഓപ്പൺ ഫൈനലില്‍ നദാലിന്‍റെ എതിരാളിയായിരുന്ന ഡാനില്‍ മെദ്‌വദേവിനെയാണ് എടിപി ഫൈനല്‍സിന്‍റെ സെമിയില്‍ നദാല്‍ നേരിടുന്നത്.

"ഈ വർഷത്തെ അവസാന ടൂർണമെന്‍റിന്‍റെ സെമിഫൈനലില്‍ കടക്കാൻ കഴിഞ്ഞത് വളരെ പ്രധാനപ്പെട്ട കാര്യമാണ്. ഡാനിലിനെതിരെ സെമിഫൈനല്‍ കളിക്കാനുള്ള തയ്യാറെടുപ്പിലാണ് ഞാൻ" നദാല്‍ മത്സരത്തിന് ശേഷം പറഞ്ഞു.

കഴിഞ്ഞ വർഷം നദാല്‍ സിറ്റ്‌സിപാസിനെ റൗണ്ട് - റോബിൻ മത്സരത്തില്‍ തോല്‍പ്പിച്ചെങ്കിലും സെമിയില്‍ പുറത്താവുകയായിരുന്നു.