ന്യൂയോര്‍ക്ക്: യു.എസ് ഓപ്പൺ ടെന്നിസ് സെമിയിൽ പ്രവേശിച്ച് സൂപ്പർ താരം നൊവാക് ജോക്കോവിച്ച്. ഇറ്റലിയുടെ മാറ്റിയോ ബെരെറ്റിനിയെ ഒന്നിന് എതിരെ മൂന്ന് സെറ്റുകൾക്ക് കീഴടക്കിയാണ് സെര്‍ബിയൻ താരം വിജയം സ്വന്തമാക്കിയത്. ഇതോടെ 21-ാം ഗ്രാൻഡ് സ്ലാം കിരീടം, കലണ്ടര്‍ സ്ലാം എന്നീ ലക്ഷ്യങ്ങളിലേക്ക് ജോക്കോ ഒരു പടി കൂടി അടുത്തു. സ്‌കോര്‍: 5-7, 6-2, 6-2, 6-3.
ആദ്യ സെറ്റ് 5-7 നഷ്ടമായ ശേഷം ശക്തമായ തിരിച്ചുവരവിലൂടെയാണ് ജോക്കോവിച്ച് സെമിയിലേക്ക് ചുവടുവെച്ചത്. തുടർന്നുള്ള മൂന്ന് സെറ്റുകളിലും ബെരെറ്റിനിയെ ഒരവസരത്തിൽ പോലും മുന്നേറാൻ അവസരം നൽകാതെ ജോക്കോവിച്ച് നിഷ്പ്രഭമാക്കുകയായിരുന്നു.