ദുബായ്‌ : ടി20 ലോകകപ്പിൽ ന്യൂസിലാന്‍ഡ് ടീമിന് തലവേദന സൃഷ്‌ടിച്ച് താരങ്ങളുടെ പരിക്ക്. കഴിഞ്ഞ ദിവസം ടീമിലെ സ്റ്റാർ പേസർ ലോക്കി ഫെർഗൂസൻ പരിക്കേറ്റ് ലോകകപ്പിൽ നിന്ന് പുറത്തായിരുന്നു. ഇതിന്‍റെ ക്ഷീണം തീരുന്നതിന് മുന്നേതന്നെ ടീമിന്‍റെ വെടിക്കെട്ട് ഓപ്പണർ മാർട്ടിൻ ഗുപ്‌റ്റിലും പരിക്കിന്‍റെ പിടിയിലായിരിക്കുകയാണ്.
പാകിസ്ഥാനെതിരായ മത്സരത്തിനിടെയാണ് പേസർ ഹാരിസ് റൗഫിന്‍റെ പന്തിൽ താരത്തിന്‍റെ പെരുവിരലിന് പരിക്കേറ്റത്. 'മത്സരത്തിന് ശേഷം ഗുപ്‌റ്റില്‍ ചെറിയ അസ്വസ്ഥതകള്‍ പ്രകടിപ്പിച്ചിരുന്നു. അവന്‍റെ അവസ്ഥ ഞങ്ങൾ നിരീക്ഷിച്ചുവരികയാണ്. 24-48 മണിക്കൂറുകൾ കഴിഞ്ഞാലേ പരിക്കിന്‍റെ ഗൗരവം വ്യക്‌തമാകുകയുള്ളൂ', മത്സരശേഷം കിവീസ് കോച്ച് ഗാരി സ്റ്റീഡ് പറഞ്ഞു.