ന്യൂഡല്‍ഹി: ടോക്കിയോ പാരാലിമ്പിക്‌സില്‍ വനിതാ ടേബിള്‍ ടെന്നീസില്‍ വെള്ളി നേടിയ ഭവിന പട്ടേലിനെ അഭിനന്ദിച്ച് മുന്‍ ക്രിക്കറ്റ് താരങ്ങളായ വീരേന്ദ്രര്‍ സെവാഗും, വിവിഎസ്‌ ലക്ഷ്‌മണും. ട്വിറ്ററിലൂടെയാണ് ഇരു താരങ്ങളും ഭവിനയെ അഭിനന്ദിച്ച് രംഗത്തെത്തിയത്.
കഠിനാധ്വാനത്തിന്‍റേയും മാനസിക ശക്തിയുടേയും ബലത്തിലാണ് താരത്തിന്‍റെ നേട്ടമെന്നായിരുന്നു സെവാഗിന്‍റെ പ്രതികരണം. പാരാലിമ്പിക്‌സില്‍ വെള്ളിമെഡല്‍ നേടുന്ന ആദ്യ ഇന്ത്യന്‍ ടേബിള്‍ ടെന്നീസ് താരമായി ചരിത്രം തീര്‍ത്തതിന് അഭിനന്ദനങ്ങള്‍ എന്നായിരുന്നു ലക്ഷ്മണ് കുറിച്ചത്.
വനിതകളുടെ ക്ലാസ് ഫോര്‍ വിഭാഗത്തിലാണ് ഭവിന വെള്ളിമെഡല്‍ നേടി ചരിത്രം കുറിച്ചത്. മത്സരത്തിന്‍റെ ഫൈനലില്‍ ചൈനയുടെ ലോക ഒന്നാം നമ്പർ താരമായ ഷൗ യിങ്ങിനോടാണ് ഭവിന തോല്‍വി വഴങ്ങിയത്. ഏക പക്ഷീയമായ മൂന്ന് സെറ്റുകള്‍ക്കായിരുന്നു ചൈനീസ് താരത്തിന്‍റെ വിജയം. സ്കോര്‍: 7-11 5-11 6-11.