ലോകകപ്പ് നിയന്ത്രിക്കാൻ വനിത റഫറിമാരും; ചരിത്രം കുറിക്കാൻ ഖത്തർ ലോകകപ്പ്

ലോകകപ്പിനായി മൂന്ന്​ വനിതകൾ ഉൾപ്പെടെ 36 റഫറിമാരുടെ പട്ടികയാണ് ഫിഫ ​വ്യാഴാഴ്‌ച പ്രഖ്യാപിച്ചത്

ഖത്തർ: ചരിത്രത്തിൽ ആദ്യമായി ലോകകപ്പ് ഫുട്‌ബോൾ മത്സരങ്ങൾ നിയന്ത്രിക്കാൻ വനിത റഫറിമാരും. ഇക്കൊല്ലം ഖത്തറിൽ ആരംഭിക്കുന്ന ഫിഫ ലോകകപ്പ് ഫുട്‌ബോളിലാണ് മത്സരം നിയന്ത്രിക്കാൻ മൂന്ന് വനിത റഫറിമാരെയും ഉൾപ്പെടുത്തിയത്. നവംബർ 21ന്​ തുടങ്ങി ഡിസംബർ 18ന്​ സമാപിക്കുന്ന ലോകകപ്പിനായി മൂന്ന്​ വനിതകൾ ഉൾപ്പെടെ 36 റഫറിമാരുടെ പട്ടികയാണ് ഫിഫ ​വ്യാഴാഴ്‌ച പ്രഖ്യാപിച്ചത്.

ഫ്രാന്‍സില്‍ നിന്നുള്ള സ്റ്റെഫാനി ഫ്രാപ്പര്‍ട്ട്, റുവാന്‍ഡക്കാരി സലീമ മുകാന്‍സാംഗ, ജപ്പാനിൽ നിന്നുള്ള യോഷിമി യമഷിദ എന്നിവരാണ് റഫറി പാനലിലേക്ക് തെരഞ്ഞെടുക്കപ്പെട്ടത്. ഇവർക്ക്​ പുറമെ അസിസ്റ്റന്‍റ്​ റഫറിമാരുടെ പട്ടികയിലും മൂന്ന്​ വനിതകളുണ്ട്​. ലോകകപ്പിനായി 36 റഫറിമാർ, 69 അസി. റഫറിമാർ, 24 വീഡിയോ മാച്ച്​ ഒഫീഷ്യൽസ്​ എന്നിവരുടെ പട്ടികയാണ്​ ഫിഫ പ്രസിദ്ധീകരിച്ചത്​.

ലോകകപ്പ് യോഗ്യത റൗണ്ടിൽ മത്സരം നിയന്ത്രിച്ച ആദ്യ വനിതയാണ് ഫ്രാൻസിൽ നിന്നുള്ള സ്റ്റെഫാനി ഫ്രപ്പാർട്ട്. യുവേഫ ചാമ്പ്യൻസ്​ ലീഗ്​ മത്സരങ്ങളും, യൂറോപ്യൻ ക്വാളിഫിയർ പോരാട്ടങ്ങളും നിയന്ത്രിച്ചും ശ്രദ്ധനേടിയ റഫറിയാണ്​ ​സ്റ്റെഫാനി. ഫ്രഞ്ച്​ ലീഗ്​ വൺ മത്സരങ്ങളിലും ഇവർ പതിവ്​ സാന്നിധ്യമാണ്​.

കഴിഞ്ഞ ആഫ്രിക്കൻ നാഷൻസ്​ കപ്പിൽ മത്സരം നിയന്ത്രിച്ച ആദ്യ വനിതയാണ്​ റുവാണ്ടക്കാരിയായ സലിമ മുകൻസാംഗ. വനിത ലോകകപ്പ്, വനിത ചാമ്പ്യൻസ് ലീഗ് എന്നിവയടക്കം വമ്പൻ ടൂർണമെന്‍റുകളിലും കളിനിയന്ത്രിച്ചിട്ടുണ്ട്. 2019 ലെ വനിത ലോകകപ്പിന്‍റെ റഫറിയായിരുന്നു ജപ്പാൻകാരിയായ യോഷിമി. എ.എഫ്​.സി ചാമ്പ്യൻസ്​ ലീഗ്​ മത്സരങ്ങൾ നിയന്ത്രിച്ചു കൊണ്ടും യോഷിമി ശ്രദ്ധ നേടിയിരുന്നു.