ജിദ്ദ : സൗദി അറേബ്യൻ ഗ്രാൻഡ് പ്രീയിൽ മുത്തമിട്ട് മാക്‌സ് വെർസ്റ്റാപ്പൻ. ഫെരാരിയുടെ ചാൾസ് ചാൾസ് ലക്ലർക്കുമായുള്ള കടുത്ത പോരാട്ടത്തിനൊടുവില്‍ 0.5 സെക്കന്‍റിന്‍റെ വ്യത്യാസത്തിലാണ് റെഡ്ബുൾ ഡ്രൈവർ വെർസ്റ്റാപ്പൻ പോഡിയത്തിലേറിയത്. ഫെരാരിയുടെ കാർലോ സൈൻസ് മൂന്നാമതും റെഡ്ബുള്ളിന്‍റെ സെർജിയോ പെരെസ് നാലാം സ്ഥാനത്തും എത്തി.
ഈ സീസണിൽ ബഹ്റൈനിലെ ആദ്യ ഗ്രാന്‍റ് പ്രീ പൂർത്തിയാക്കാൻ സാധിക്കാതിരുന്ന വെർസ്റ്റാപ്പന്‍റെ ആദ്യ ജയമാണിത്. മാക്‌സ് വെർസ്റ്റാപ്പനും സഹതാരം സെർജിയോ പെരസും ബഹ്റൈൻ റേസിന്‍റെ അവസാന ലാപ്പിൽ എൻജിൻ തകരാറുമൂലം പിൻമാറിയത് റെഡ്ബുള്ളിന് തിരിച്ചടിയായിരുന്നു. മേഴ്‌സിഡെസിന്‍റെ ജോർജ് റസൽ അഞ്ചാമതും ആൽപൈനിന്‍റെ എസ്‌തബാൻ ഒകോണും മക്ലാരന്‍റെ ലാണ്ടോ നോറിസും യഥാക്രമം ആറും ഏഴും സ്ഥാനത്തും ഫിനിഷ് ചെയ്‌തു. പതിനഞ്ചാമതായി റേസ് തുടങ്ങിയ മുൻ ചാമ്പ്യൻ ലൂയിസ് ഹാമിൽട്ടൺ 10-ാം സ്ഥാനത്താണ് ഫിനിഷ് ചെയ്‌തത്.