ന്യൂയോര്‍ക്ക് : യുഎസ് ഓപ്പണ്‍ ടെന്നീസിന്‍റെ ഫൈനലില്‍ കടന്ന് സ്‌പാനിഷ് സെന്‍സേഷന്‍ കാർലോസ് അൽകാരസ്. പുരുഷ വിഭാഗം സെമിയില്‍ അമേരിക്കയുടെ ഫ്രാൻസിസ് ടിയാഫോയെയാണ് 19കാരനായ അൽകാരസ് തോല്‍പ്പിച്ചത്. നാല് മണിക്കൂര്‍ 19 മിനിട്ട് നീണ്ടുനിന്ന അഞ്ച് സെറ്റ് പോരാട്ടത്തിനൊടുവിലാണ് 24കാരനായ ടിയാഫോ മൂന്നാം സീഡായ അല്‍കാരസിന് മുന്നില്‍ കീഴടങ്ങിയത്.
കടുത്ത പോരാട്ടം കണ്ട ആദ്യ സെറ്റില്‍ വിജയം നേടിയത് ടിയാഫോയാണ്. തുടര്‍ന്ന് രണ്ടും മൂന്നും സെറ്റുകള്‍ നേടി അൽകാരസ് മുന്നിലെത്തി. എന്നാല്‍ നാലാം സെറ്റ് പിടിച്ച് ഫ്രാൻസിസ് ടിയാഫോ ഒപ്പമെത്തി. ഇതോടെ നിര്‍ണായകമായ അഞ്ചാം സെറ്റ് നേടിയാണ് അൽകാരസ് വിജയം പിടിച്ചത്. സ്‌കോര്‍: 6-7(6), 6-3, 6-1, 6-7(5), 6-3.