ഫുക്കറ്റ് : തായ്‌ലൻഡ് ഓപ്പൺ ഇന്‍റർനാഷണൽ ബോക്‌സിങ് ടൂർണമെന്‍റിൽ മിന്നുന്ന ഫോം തുടര്‍ന്ന് ഇന്ത്യൻ ബോക്‌സർ ആശിഷ് കുമാർ. പുരുഷൻമാരുടെ 81 കിലോഗ്രാം സെമിയിൽ ഇന്തോനേഷ്യയുടെ മൈഖേൽ റോബർഡ് മസ്‌കിതയെ കീഴടക്കിയ താരം ഫൈനലില്‍ കടന്നു. മത്സരത്തില്‍ 5-0നാണ് ഇന്ത്യന്‍ താരം ജയം പിടിച്ചത്.
കഴിഞ്ഞ വര്‍ഷം പുരുഷന്മാരുടെ 75 കിലോ വിഭാഗത്തില്‍ സ്വര്‍ണ മെഡല്‍ ജേതാവ് കൂടിയാണ് ആശിഷ്. താരത്തിന് പുറമെ മോണിക്ക, ഗോവിന്ദ് സഹാനി, വരീന്ദർ സിങ് എന്നിവരാണ് ഫൈനലിൽ കടന്നത്.
വനിതകളുടെ 48 കിലോഗ്രാം സെമിയില്‍ വിയറ്റ്നാമിന്‍റെ ട്രാൻ തി ഡിയെം കിയുവിനെ കീഴടക്കിയാണ് 26കാരിയായ മോണിക്കയുടെ മുന്നേറ്റം. ക്വാര്‍ട്ടറില്‍ രണ്ട് തവണ ലോക ചാമ്പ്യൻഷിപ്പ് മെഡൽ ജേതാവായ ജോസി ഗാബുകോയെ അട്ടിമറിച്ചാണ് താരം സെമിക്കെത്തിയത്.