ഭുവനേശ്വർ :സ്വവർഗാനുരാഗിയാണെന്ന് വെളിപ്പെടുത്തിയത് സഹോദരിയുടെ ബ്ലാക്ക്‌മെയിലിനെ തുടർന്നെന്ന് വനിതാ അത്‌ലറ്റ് ദ്യുതി ചന്ദ്. കഴിഞ്ഞ ദിവസം ഒഡീഷയിലെ തന്‍റെ ഗ്രാമത്തിലുള്ള പെണ്‍കുട്ടിയുമായി പ്രണയത്തിലാണെന്ന് ദ്യുതി വെളിപ്പെടുത്തിയിരുന്നു. എന്നാൽ താരത്തിന്‍റെ വെളിപ്പെടുത്തലിനെതിരെ കുടുംബാംഗങ്ങൾ ഒന്നടങ്കം രംഗത്ത് വന്നിരുന്നു. ഇതിനു പിന്നാലെയാണ് സഹോദരിക്കെതിരെ ആരോപണവുമായി ദ്യുതിയും രംഗത്തെത്തിയത്.
25 ലക്ഷം രൂപ ആവശ്യപ്പെട്ട് സ്വന്തം സഹോദരി ബ്ലാക്ക്‌മെയില്‍ ചെയ്തതുകൊണ്ടാണ് സ്വവർഗബന്ധം വെളിപ്പെടുത്തേണ്ടി വന്നതെന്ന് ഭുവനേശ്വറിൽ നടത്തിയ വാർത്താ സമ്മേളനത്തിൽ ദ്യുതി ആരോപിച്ചു. മൂത്തസഹോദരിക്ക് ബന്ധത്തിൽ എതിർപ്പുണ്ടെന്ന് ദ്യുതി നേരത്തെ വ്യക്തമാക്കിയിരുന്നു. മുമ്പ് സഹോദരി തന്നെ ക്രൂരമായി മർദ്ദിച്ചതായും താരം മാധ്യമങ്ങളോടു പറഞ്ഞു. ഇക്കാര്യം താൻ പൊലീസിനെ അറിയിച്ചിരുന്നു. പണം ആവശ്യപ്പെട്ടുള്ള ഭീഷണി സഹിക്കാൻ പറ്റാതെയാണ് സ്വവർഗ പ്രണയത്തിന്‍റെ കാര്യം പുറത്തറിയിച്ചത്. പ്രായപൂർത്തിയായ വ്യക്തിയാണ് താൻ. കുടുംബത്തിന്‍റെ സമ്മർദ്ദത്തിൽ വീഴില്ല. സ്വവർഗ ബന്ധമുള്ള കാര്യം പുറത്തുപറയാൻ അഭിമാനം മാത്രമേയുള്ളൂ. പങ്കാളിക്ക് പൊതു സമൂഹത്തിനു മുന്നിൽ വരാൻ താത്പര്യമില്ലെന്നു പറഞ്ഞ ദ്യുതി ഈ തീരുമാനത്തെ താൻ ബഹുമാനിക്കുന്നുവെന്നും കൂട്ടിച്ചേർത്തു.