മാഡ്രിഡ് : ബാലൺ ദ്യോർ പുരസ്‌കാരം ലഭിക്കാന്‍ സ്പാനിഷ് ഫുട്ബോൾ പ്രസിഡന്‍റ് ലൂയിസ് റുബിയാലസിനോട് മുൻ റയൽ മാഡ്രിഡ് നായകനും നിലവിൽ പിഎസ്‌ജി താരവുമായ സെർജിയോ റാമോസ് സഹായം അഭ്യർഥിച്ചതായി റിപ്പോര്‍ട്ട്. ഇരുവരും തമ്മില്‍ നടത്തിയ വാട്ട്സ്ആപ്പ് ചാറ്റ് സ്പാനിഷ് മാധ്യമമായ 'എൽ കോൺഫിഡൻഷ്യൽ' പുറത്തുവിട്ടു. 2020 ജൂലൈ 16നും ഓഗസ്റ്റ് 8നും ഇടയിൽ നടന്ന സംഭാഷണങ്ങളാണ് പുറത്തുവന്നത്.
യുവേഫ, ബാലൺ ദ്യോർ കമ്മിറ്റികളിൽ റൂബിയാലസിനുള്ള ബന്ധങ്ങൾ തനിക്ക് വേണ്ടി ഉപയോഗിക്കണമെന്നാണ് റാമോസ് ആവശ്യപ്പെടുന്നത്. അതുനേടാൻ കഴിഞ്ഞാൽ ജീവിത കാലം മുഴുവന്‍ കടപ്പാടുണ്ടാകുമെന്നും, സ്പാനിഷ് ഫുട്ബോൾ അതർഹിക്കുന്നുവെന്നും റുബിയാലസിനോട് റാമോസ് പറയുന്നുണ്ട്.
എന്നാല്‍ 2019-20 സീസണിലെ റാമോസിന്‍റെ പ്രകടനത്തെ അഭിനന്ദിച്ച റൂബിയാലസ്, സഹായിക്കാമെന്നേറ്റെങ്കിലും തനിക്ക് ഇത്തരം കാര്യങ്ങളിൽ പരിമിതമായ അധികാരം മാത്രമേ ഉള്ളൂവെന്നും വ്യക്തമാക്കുന്നുണ്ട്. സീസണില്‍ റയല്‍ മാഡ്രിഡിനായി തിളങ്ങിയ താരം ക്ലബ്ബിന്‍റെ 34ാം ലാ ലിഗ കിരീട നേട്ടത്തില്‍ നിര്‍ണായകമായിരുന്നു.