കൊൽക്കത്ത: സെക്‌സിസ്റ്റ് പരാമര്‍ശത്തില്‍ വീണ്ടും ഖേദം പ്രകടിപ്പ് എടികെ മോഹന്‍ ബഗാന്‍ താരം സന്ദേശ് ജിങ്കൻ. തന്‍റെ ട്വിറ്ററിൽ പോസ്റ്റ് ചെയ്‌ത വീഡിയോയിലൂടെയാണ് താരം ഖേദ പ്രകടനം നടത്തിയത്. ബ്ലാസ്റ്റേഴ്‌സിനെതിരായ പരാമർശത്തെത്തുടർന്ന് താരത്തിനെതിരെ കടുത്ത വിമർശനമാണ് ഉയർന്നുവരുന്നത്.
'മത്സരം കഴിഞ്ഞ ആവേശത്തിലാണ് അത്തരമൊരു പരാമർശം നടത്തിയത്. അത് വളരെ തെറ്റായിരുന്നു. ഈ പരാമർശത്തിലൂടെ എന്നെ പിന്തുണക്കുന്നവരെ മാത്രമല്ല എന്‍റെ കുടുംബാംഗങ്ങളേയും ഞാൻ നിരാശരാക്കി. സംഭവിച്ച കാര്യങ്ങൾ ഒരിക്കലും മായ്‌ച്ചുകളയാനാവില്ല. അതിൽ നിരാശയുണ്ട്', ജിങ്കൻ പറഞ്ഞു.
'എന്‍റെ പരാമർശം ആരാധകരെ അസ്വസ്ഥരാക്കിയിട്ടുണ്ട്. പക്ഷേ അതിന്‍റെ പേരിൽ എന്നെയും എന്‍റെ കുടുംബത്തേയും ഭീഷണിപ്പെടുത്തുകയും വംശീയമായി അധിക്ഷേപിക്കുകയും ചെയ്യരുത്. അത് നിങ്ങളോടുള്ള എന്‍റെ അഭ്യർഥനയാണ്. ഇതിൽ നിന്ന് പാഠം ഉൾക്കൊണ്ട് മികച്ചൊരു മനുഷ്യനായി ഞാൻ മാറും'. ജിങ്കൻ വീഡിയോയിൽ പറഞ്ഞു.