ഒളിമ്പിക്സിലേക്ക് നീന്തിക്കയറി സജന്‍ ; അഭിമാന നേട്ടവുമായി മലയാളി താരം

ഒളിമ്പിക്സിന് നേരിട്ട് യോ​ഗ്യത നേടുന്ന ആദ്യ ഇന്ത്യൻ നീന്തൽ താരം എന്ന നേട്ടം സ്വന്തമാക്കി 27കാരന്‍ സജൻ.

റോം : മലയാളി നീന്തൽ താരം സജൻ പ്രകാശിന് ടോക്കിയോ ഒളിമ്പിക്സിന് യോ​ഗ്യത. റോമിൽ നടന്ന കോളി ട്രോഫിയിലാണ് സജൻ ചരിത്രം കുറിച്ച് ഒളിമ്പിക്സിലേക്ക് നീന്തിക്കയറിയത്. 1:56:38 സെക്കൻഡില്‍ ഒന്നാമതെത്തിയ താരം എ വിഭാഗത്തിലാണ് ടോക്കിയോയ്ക്ക് ടിക്കറ്റെടുത്തത്.

ഇതോടെ ഒളിമ്പിക്സിന് നേരിട്ട് യോ​ഗ്യത നേടുന്ന ആദ്യ ഇന്ത്യൻ നീന്തൽ താരം എന്ന നേട്ടവും 27കാരനായ സജൻ സ്വന്തമാക്കി. 1:56.48 സെക്കന്‍റായിരുന്നു ഒളിമ്പിക്സിന് നേരിട്ട് യോ​ഗ്യതയ്ക്ക് വേണ്ടിയിരുന്ന സമയം. ടോക്കിയോയില്‍ 200 മീറ്റർ ബട്ടർഫ്ലൈ ഇനത്തിലാവും സജൻ മത്സരിക്കുക.

അതേസമയം കഴിഞ്ഞ ആഴ്ച നടന്ന ബെൽഗ്രേഡ് ട്രോഫിയില്‍ സജൻ സ്വർണം നേടിയിരുന്നെങ്കിലും ഒളിമ്പിക്സിന് നേരിട്ട് യോ​ഗ്യത നേടാനായിരുന്നില്ല. ബെൽ​ഗ്രേഡിൽ 1.56.96 സെക്കന്‍ഡിലായിരുന്നു താരത്തിന്‍റെ നേട്ടം. 2016ലെ റിയോ ഒളിമ്പിക്സിലും താരം പങ്കെടുത്തിട്ടുണ്ട്.