ബാങ്കോക്ക് : സൂപ്പര്‍ താരം ക്രിസ്‌റ്റ്യാനോ റൊണാള്‍ഡോയെ വില്‍ക്കാന്‍ ഉദ്ദേശിക്കുന്നില്ലെന്ന് മാഞ്ചസ്‌റ്റര്‍ യുണൈറ്റഡ് കോച്ച് എറിക് ടെൻ ഹാഗ്. വരുന്ന സീസണ്‍ അദ്ദേഹത്തിനൊപ്പമാണ് പ്ലാന്‍ ചെയ്‌തിരിക്കുന്നത്. ക്രിസ്‌റ്റ്യാനോ റൊണാള്‍ഡോയ്‌ക്കൊപ്പം പ്രവര്‍ത്തിക്കാന്‍ താന്‍ കാത്തിരിക്കുകയാണെന്നും ടെൻ ഹാഗ് അഭിപ്രായപ്പെട്ടു.
നിലവില്‍ പ്രീ-സീസണ്‍ മത്സരങ്ങള്‍ക്കായി തായ്‌ലാന്‍ഡില്‍ പര്യടനം നടത്തുകയാണ് ടീം. ഈ ടീമിനൊപ്പം ക്രിസ്‌റ്റ്യാനോ റൊണാള്‍ഡോ ഇല്ലാതിരുന്നത് അദ്ദേഹം ക്ലബ് വിടുന്നു എന്ന വാര്‍ത്തകള്‍ക്ക് ശക്തി പകര്‍ന്നിരുന്നു. എന്നാല്‍ വ്യക്തിപരമായ ചില കാരണങ്ങള്‍ കൊണ്ടാണ് തായ്‌ലാന്‍ഡില്‍ പര്യടനം നടത്തുന്ന ടീമില്‍ നിന്നും റൊണാള്‍ഡോ വിട്ടുനിന്നതെന്നും ടെൻ ഹാഗ് വ്യക്തമാക്കി.