സിംഗപ്പൂര്‍:സൈന നേവാളും,പി.വി സിന്ധുവും, എച്ച് എസ് പ്രണോയിയും സിംഗപ്പൂര്‍ ഓപ്പണ്‍ ക്വാര്‍ട്ടര്‍ ഫൈനലില്‍ പ്രവേശിച്ചു. വിയറ്റ്‌നാം താരം ലിന്‍ ങുയേനെ തകര്‍ത്താണ് സിന്ധുവിന്‍റെ മുന്നേറ്റം. സ്കോര് 19-21, 21-19, 21-18.
ആദ്യ ഗെയിം വിയറ്റനാമി താരത്തിന് അടിയറവ് പറഞ്ഞ സിന്ധു രണ്ടും മൂന്നും ഗെയിമുകള്‍ വിയര്‍ത്താണ് സ്വന്തമാക്കിയത്. ചൈനയുടെ ഹാന്‍ യൂവാണ് ക്വാര്‍ട്ടറില്‍ സിന്ധുവിന്‍റെ എതിരാളി.
ലോക ഒന്‍പതാം നമ്പര്‍ താരത്തെ തകര്‍ത്താണ് സൈനയുടെ മുന്നേറ്റം. സ്കോര് 21-19, 11-21, 21-17.
ഒരു മണിക്കൂറും അന്‍പത് മിനിറ്റും നീണ്ട പോരാട്ടത്തിനൊടുവില്‍ ലോക നാലാം നമ്പര്‍ ചൗ ടീന്‍ ചെനിനെ തോല്‍പ്പിച്ചാണ് പ്രണോയ് ക്വാര്‍ട്ടറില്‍ കടന്നത്. ആദ്യ ഗെയിമില്‍ പിന്നിട്ട് നിന്ന ശേഷമായിരുന്നു പ്രണോയിയുടെയും തിരിച്ചുവരവ്. സ്കോര് 14-21, 22-20, 21-18. ജപ്പാന്‍ താരം കൊടൈ നരൗകയാണ് ക്വാര്‍ട്ടറില്‍ പ്രണോയിയുടെ എതിരാളി.
അതേ സമയം മറ്റൊരു ഇന്ത്യന്‍ താരമായ മിഥുന്‍ മഞ്‌ജുനാഥ് രണ്ടാം റൗണ്ടില്‍ പുറത്തായി. അയര്‍ലന്‍ഡ് താരത്തോടാണ് മിഥുന്‍ രണ്ടാം റൗണ്ടില്‍ പരാജയപ്പെട്ടത്. സ്കോര് 10-21, 21-18, 16-21.