ലണ്ടന്‍ : ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡ്, മാഞ്ചസ്റ്റര്‍ സിറ്റി ടീമുകള്‍ക്ക് വിജയം. എത്തിഹാദ് സ്റ്റേഡിയത്തില്‍ നടന്ന മത്സരത്തില്‍ സിറ്റി ആസ്റ്റണ്‍ വില്ലയെ കീഴടക്കിയപ്പോള്‍ എവേ മത്സരത്തില്‍ ലീഡ്‌സിനെതിരെയാണ് യുണൈറ്റഡ് വിജയിച്ചത്. ജയത്തോടെ ലീഗില്‍ സിറ്റിക്ക് 48 ഉം യുണൈറ്റഡിന് 46ഉം പോയിന്‍റായി.
ആസ്റ്റണ്‍ വില്ലയെ 3-1 എന്ന സ്‌കോറിനാണ് മാഞ്ചസ്റ്റര്‍ സിറ്റി തോല്‍പ്പിച്ചത്. യുണൈറ്റഡ് ലീഡ്‌സിനെതിരെ എതിരില്ലാത്ത രണ്ട് ഗോളിന് വിജയിച്ചുകയറുകയായിരുന്നു.
വിജയവഴിയില്‍ മാഞ്ചസ്റ്റര്‍ സിറ്റി :ടോട്ടന്‍ഹാമിനോടേറ്റ തോല്‍വിയുടെ ക്ഷീണം മാറ്റി വിജയവഴിയില്‍ തിരികെയെത്തുക എന്ന ലക്ഷ്യത്തോടെയാണ് ആസ്റ്റണ്‍ വില്ലയെ നേരിടാന്‍ പെപ്പ് ഗാര്‍ഡിയോളയുടെ സംഘം എത്തിഹാദ് മൈതാനിയില്‍ ഇറങ്ങിയത്. അതുകൊണ്ട് തന്നെ മത്സരത്തിന്‍റെ തുടക്കം മുതല്‍ സിറ്റി മികച്ച നീക്കങ്ങളിലൂടെ എതിരാളികളുടെ ഗോള്‍മുഖത്തേക്ക് ആക്രമണം നടത്തി. മത്സരത്തിന്‍റെ നാലാം മിനിട്ടില്‍ തന്നെ ആദ്യ ഗോള്‍ നേടി ലീഡ് സ്വന്തമാക്കാന്‍ സിറ്റിക്കായി.
ആദ്യം ലഭിച്ച കോര്‍ണര്‍ തന്നെ സിറ്റി ക്യത്യമായി ലക്ഷ്യത്തില്‍ എത്തിക്കുകയായിരുന്നു. ഹെഡറിലൂടെ റോഡ്രിയാണ് ആതിഥേയര്‍ക്ക് ലീഡ് സമ്മാനിച്ചത്. തുടര്‍ന്നും സിറ്റി താരങ്ങള്‍ ആസ്റ്റണ്‍ വില്ല ഗോള്‍ കീപ്പര്‍ എമിലിയാനോ മാര്‍ട്ടിനെസിനെ പ്രതിരോധത്തിലാക്കിക്കൊണ്ടേയിരുന്നു.
തുടര്‍ച്ചയായ മുന്നേറ്റങ്ങള്‍ക്കൊടുവില്‍ സിറ്റി മത്സരത്തിന്‍റെ 39-ാം മിനിട്ടില്‍ ലീഡ് രണ്ടാക്കി ഉയര്‍ത്തി. ഇത്തവണ മധ്യനിരതാരം ഗുണ്ടോഗന്‍റെ വകയായിരുന്നു ഗോള്‍. പിന്നാലെ ആദ്യ പകുതി അവസാനിക്കുന്നതിന് മുന്‍പ് തന്നെ ലീഡ് വീണ്ടുമുയര്‍ത്താന്‍ സിറ്റിക്ക് അവസരമൊരുങ്ങി.