ലണ്ടന്‍: പ്രീമിയര്‍ ലീഗില്‍ (Premier League) ജയം തുടര്‍ന്ന് ലിവര്‍പൂള്‍ (Liverpool). ബ്രാമള്‍ ലെയ്‌നില്‍ നടന്ന മത്സരത്തില്‍ പോയിന്‍റ് പട്ടികയിലെ അവസാന സ്ഥാനക്കാരായ ഷെഫീല്‍ഡ് യുണൈറ്റഡിനെയാണ് (Sheffield United) ലിവര്‍പൂള്‍ തകര്‍ത്തത്. എതിരില്ലാത്ത രണ്ട് ഗോളുകള്‍ക്കാണ് ക്ലോപ്പിന്‍റെ ശിഷ്യന്മാര്‍ ജയം പിടിച്ചത് (Sheffield United vs Liverpool Match Result).
വിര്‍ജില്‍ വാന്‍ ഡൈക്ക് (Virjil Van Djik), ഡോമിനിക്ക് സോബോസ്ലൈ (Dominik Szoboszlai) എന്നിവരാണ് ലിവര്‍പൂളിനായി ഗോളുകള്‍ നേടിയത്. സീസണില്‍ തോല്‍വി അറിയാതെ ലിവര്‍പൂള്‍ പൂര്‍ത്തിയാക്കിയ തുടര്‍ച്ചയായ എട്ടാം മത്സരമായിരുന്നു ഇത്. ജയത്തോടെ പോയിന്‍റ് പട്ടികയില്‍ രണ്ടാം സ്ഥാനം നിലനിര്‍ത്താന്‍ അവര്‍ക്കായി.
15 മത്സരങ്ങളില്‍ നിന്നും 10 ജയവും നാല് സമനിലയും സ്വന്തമാക്കിയ ലിവര്‍പൂളിന് 34 പോയിന്‍റാണ് ഉള്ളത്. ഒന്നാം സ്ഥാനക്കാരായ ആഴ്‌സണലിനേക്കാള്‍ രണ്ട് പോയിന്‍റ് പിന്നില്‍ മാത്രമാണ് നിലവില്‍ ലിവര്‍പൂള്‍ (Premier League Points Table).
ഷെഫീല്‍ഡിന്‍റെ മൈതാനത്ത് അവര്‍ക്കെതിരെ വ്യക്തമായ ആധിപത്യം സ്ഥാപിച്ചായിരുന്നു ലിവര്‍പൂള്‍ ജയം പിടിച്ചത്. മത്സരത്തില്‍ 77 ശതമാനം ബോള്‍ പൊസെഷനും ലിവര്‍പൂളിന്‍റെ കാലുകളിലായിരുന്നു. പാസുകളുടെ എണ്ണത്തിലും പായിച്ച ഷോട്ടുകളുടെ എണ്ണത്തിലുമെല്ലാം ആതിഥേയരേക്കാള്‍ ഏറെ മുന്നിലായിരുന്നു സന്ദര്‍ശകര്‍.