ലണ്ടന്‍: പ്രീമിയര്‍ ലീഗില്‍ (Premier League) ഈ വര്‍ഷത്തെ അവസാന മത്സരം തോറ്റ് മാഞ്ചസ്റ്റര്‍ യുണൈറ്റഡ് (Manchester United). എവേ മത്സരത്തില്‍ നോട്ടിങ്ങ്ഹാം ഫോറസ്റ്റാണ് (Nottm Forest) ചുവന്ന ചെകുത്താന്മാരെ തകര്‍ത്തത്. സിറ്റി ഗ്രൗണ്ടില്‍ നടന്ന മത്സരത്തില്‍ ഒന്നിനെതിരെ രണ്ട് ഗോളുകള്‍ക്കാണ് മാഞ്ചസ്റ്റര്‍ യുണൈറ്റഡ് തോല്‍വി വഴങ്ങിയത് (NFO vs MAN Match Result).
നിക്കോളസ് ഡൊമിംഗസും (Nicolas Dominguez), മോര്‍ഗന്‍ ഗിബ്‌സ് വൈറ്റുമാണ് മത്സരത്തില്‍ ആതിഥേയര്‍ക്കായി ഗോള്‍ നേടിയത്. മാര്‍ക്കസ് റാഷ്‌ഫോര്‍ഡിലൂടെ (Marcus Rashford) യുണൈറ്റഡ് ആശ്വാസ ഗോളും കണ്ടെത്തി. സീസണില്‍ യുണൈറ്റഡിന്‍റെ 9-ാം തോല്‍വിയാണിത്.
സിറ്റി ഗ്രൗണ്ടില്‍ നടന്ന മത്സരത്തിന്‍റെ ആദ്യ പകുതി ഗോള്‍ രഹിതമായിരുന്നു. മികച്ച അവസരങ്ങള്‍ ഒന്നും തന്നെ ഒന്നാം പകുതിയില്‍ സൃഷ്‌ടിച്ചെടുക്കാന്‍ ഇരു ടീമിനും സാധിച്ചില്ല. 64-ാം മിനിറ്റിലാണ് മത്സരത്തിലെ ആദ്യ ഗോള്‍ പിറക്കുന്നത്.
യുണൈറ്റഡിന്‍റെ പ്രതിരോധപ്പൂട്ട് പൊളിച്ചുകൊണ്ട് നിക്കോളസ് ഡൊമിംഗസായിരുന്നു ആതിഥേയര്‍ക്ക് ലീഡ് സമ്മാനിച്ചത്. പിന്നാലെ, മറുപടി ഗോളിന് വേണ്ടി യുണൈറ്റഡ് ആക്രമണങ്ങള്‍ കടുപ്പിച്ചു. ഒന്നിന് പിറകെ ഒന്നായി നോട്ടിങ്ങ്ഹാം ഫോറസ്റ്റ് ബോക്‌സിലേക്ക് യുണൈറ്റഡ് ഇരച്ചെത്തി.
78-ാം മിനിറ്റില്‍ തന്നെ അവര്‍ സമനില ഗോളും നേടി. നോട്ടിങ്ങ്ഹാം ഗോള്‍ കീപ്പര്‍ ടര്‍ണര്‍ വരുത്തിയ പിഴവില്‍ നിന്നായിരുന്നു യുണൈറ്റഡിന്‍റെ പിറവി. ബോക്‌സിനുള്ളില്‍ നിന്നും ടര്‍ണര്‍ മധ്യനിര താരം ഡാനിലോയെ ലക്ഷ്യമാക്കി ഒരു പാസ് നല്‍കി.
എന്നാല്‍, ആവശ്യത്തിന് വേഗമില്ലാതിരുന്ന പാസ് ഗര്‍നാച്ചോ തട്ടിയെടുത്തു. പിന്നാലെ, റാഷ്‌ഫോര്‍ഡിന് ആ പന്ത് മറിച്ചുനല്‍കി. അവസരം കാത്തുനിന്ന യുണൈറ്റഡ് സ്ട്രൈക്കര്‍ തകര്‍പ്പന്‍ ഫിനിഷിങ്ങിലൂടെ പന്ത് ഗോള്‍വലയിലെത്തിച്ചു.