ലണ്ടന്‍: പ്രീമിയര്‍ ലീഗില്‍ (Premier League) മാഞ്ചസ്റ്റര്‍ യുണൈറ്റഡിന്‍റെ (Manchester United) വിജയക്കുതിപ്പിന് വിരാമം. തുടര്‍ച്ചയായ നാലാം ജയം തേടിയിറങ്ങിയ മാൻയു ന്യൂകാസില്‍ യുണൈറ്റഡിനോടാണ് (Newcastle United) തോല്‍വി വഴങ്ങിയത്. സെന്‍റ് ജെയിംസ് പാര്‍ക്കില്‍ നടന്ന മത്സരത്തില്‍ ഏകപക്ഷീയമായ ഒരു ഗോളിനാണ് മാഞ്ചസ്റ്റര്‍ യുണൈറ്റഡ് പരാജയപ്പെട്ടത് (Newcastle United vs Manchester United Match Result).
മത്സരത്തില്‍ ആന്‍റണി ഗോര്‍ഡനാണ് ആതിഥേയര്‍ക്കായി ഗോള്‍ നേടിയത്. ജയത്തോടെ പോയിന്‍റ് പട്ടികയില്‍ അഞ്ചാം സ്ഥാനത്തേക്ക് എത്താന്‍ ന്യൂകാസില്‍ യുണൈറ്റഡിനായി. ലീഗിലെ ആറാം തോല്‍വി വഴങ്ങിയ മാഞ്ചസ്റ്റര്‍ യുണൈറ്റഡ് പോയിന്‍റ് പട്ടികയില്‍ ഏഴാം സ്ഥാനത്താണ്.
സെന്‍റ് ജെയിംസ് പാര്‍ക്കില്‍ നടന്ന മത്സരത്തില്‍ ആതിഥേയരായ ന്യൂകാസിലിന് ഒരു ഘട്ടത്തില്‍ പോലും വെല്ലുവിളി ഉയര്‍ത്താന്‍ മാഞ്ചസ്റ്റര്‍ യുണൈറ്റഡിനായിരുന്നില്ല. തുടക്കം മുതല്‍ ഒടുക്കം വരെ ന്യൂകാസിലിന്‍റെ ആധിപത്യമായിരുന്നു മത്സരത്തില്‍. ആദ്യ വിസില്‍ മുതല്‍ക്കുതന്നെ ന്യൂകാസിലിന് ചെകുത്താന്മാരെ വിറപ്പിക്കാന്‍ സാധിച്ചു.
ആദ്യ പത്ത് മിനിറ്റിനുള്ളില്‍ തന്നെ മാഞ്ചസ്റ്റര്‍ യുണൈറ്റഡിനെ സമ്മര്‍ദത്തിലാക്കാനും ന്യൂകാസിലിനായി. രണ്ട് വിങ്ങുകളിലൂടെയും ന്യൂകാസിലിന്‍റെ മുന്നേറ്റങ്ങള്‍ മാഞ്ചസ്റ്റര്‍ ബോക്‌സിലേക്ക് എത്തിക്കൊണ്ടേയിരുന്നു. എന്നാല്‍, അതില്‍ നിന്നെല്ലാം കഷ്ടിച്ചാണ് അവര്‍ രക്ഷപ്പെട്ടത്.
39-ാം മിനിറ്റില്‍ ന്യൂകാസില്‍ താരം ട്രിപ്പിയര്‍ (Trippier) പായിച്ച ഫ്രീ കിക്ക് ക്രോസ് ബാറില്‍ ഇടിച്ചു. ഇതോടെ മത്സരത്തിന്‍റെ ആദ്യ പകുതി ഗോള്‍ രഹിതമായി അവസാനിച്ചു.