ലണ്ടന്‍ : പ്രീമിയര്‍ ലീഗ് (Premier League) ഫുട്‌ബോളില്‍ മാഞ്ചസ്റ്റര്‍ സിറ്റിയ്‌ക്ക് (Manchester City) സമനില കുരുക്ക്. പോയിന്‍റ് പട്ടികയിലെ 15-ാം സ്ഥാനക്കാരായ ക്രിസ്റ്റല്‍ പാലസ് (Crystal Palace) ആണ് സിറ്റിയെ എമിറേറ്റ്‌സ് സ്റ്റേഡിയത്തില്‍ സമനിലയില്‍ പൂട്ടിയത്. രണ്ട് ഗോളിന് മുന്നിട്ട് നിന്ന ശേഷമായിരുന്നു മാഞ്ചസ്റ്റര്‍ സിറ്റി മത്സരത്തില്‍ സമനില വഴങ്ങിയത് (MCFC vs PAL Match Result).
സീസണിലെ 15-ാം മത്സരത്തിന് ഇറങ്ങിയ സിറ്റിക്ക് ആദ്യ പകുതിയില്‍ തന്നെ ലീഡ് പിടിക്കാനായി. 24-ാം മിനിറ്റില്‍ ജാക്ക് ഗ്രീലിഷാണ് (Jack Grealish) ആതിഥേയര്‍ക്ക് വേണ്ടി ആദ്യ ഗോള്‍ നേടിയത്. ഈ ഗോളിന്‍റെ ലീഡുമായാണ് പെപ് ഗ്വാര്‍ഡിയോളയും സംഘവും ആദ്യ പകുതിയില്‍ കളി അവസാനിപ്പിച്ചത്.
രണ്ടാം പകുതിയുടെ തുടക്കത്തില്‍ തന്നെ ലീഡ് ഉയര്‍ത്താന്‍ സിറ്റിക്കായി. റിക്കോ ലൂയിസായിരുന്നു (Rico Lewis) ഗോള്‍ സ്കോറര്‍. സ്വന്തം തട്ടകത്തില്‍ സിറ്റി ജയം പ്രതീക്ഷിച്ചിരുന്ന സമയത്തായിരുന്നു മത്സരത്തിലേക്ക് ക്രിസ്റ്റല്‍ പാലസ് വമ്പന്‍ തിരിച്ചുവരവ് നടത്തിയത്.
മത്സരത്തിന്‍റെ 76-ാം മിനിറ്റില്‍ ജീന്‍ ഫിലിപ്പെ മറ്റേറ്റയിലൂടെ (Jean Philippe Mateta) സിറ്റിയുടെ വലയിലേക്ക് ആദ്യ ഗോള്‍ എത്തിക്കാന്‍ ക്രിസ്റ്റല്‍ പാലസിനായി. ഇഞ്ചുറി ടൈമില്‍ ലഭിച്ച പെനാല്‍റ്റി ഗോളാക്കി മാറ്റി മൈക്കില്‍ ഒലിസെ (Michael Olise) സന്ദര്‍ശകര്‍ക്ക് സമനില സമ്മാനിക്കുകയായിരുന്നു. ഈ സമനിലയോടെ 34 പോയിന്‍റുമായി പോയിന്‍റ് പട്ടികയില്‍ നാലാം സ്ഥാനത്ത് തന്നെ തുടരുകയാണ് മാഞ്ചസ്റ്റര്‍ സിറ്റി.
ഒടുവില്‍ ജയം...:തുടര്‍ച്ചയായ തോല്‍വികള്‍ക്ക് പിന്നാലെ വീണ്ടും വിജയവഴിയില്‍ തിരിച്ചെത്തി ചെല്‍സി (Chelsea). ഹോം ഗ്രൗണ്ടായ സ്റ്റാംഫോര്‍ഡ് ബ്രിഡ്‌ജില്‍ നടന്ന മത്സരത്തില്‍ ഷെഫീല്‍ഡ് യുണൈറ്റഡിനെയാണ് (Sheffield United) നീലപ്പട തോല്‍പ്പിച്ചത്. എതിരില്ലാത്ത രണ്ട് ഗോളുകള്‍ക്കായിരുന്നു മത്സരത്തില്‍ ചെല്‍സിയുടെ ജയം (CHE vs SHU Match Result).