ലണ്ടന്‍:പ്രീമിയര്‍ ലീഗില്‍ (Premier League) മാഞ്ചസ്റ്റര്‍ സിറ്റിയെ (Manchester City) വീഴ്‌ത്തി ആസ്റ്റണ്‍ വില്ല (Aston Villa). വില്ല പാര്‍ക്കില്‍ നടന്ന മത്സരത്തില്‍ എതിരില്ലാത്ത ഒരു ഗോളിനാണ് സന്ദര്‍ശകരായ മാഞ്ചസ്റ്റര്‍ സിറ്റിക്ക് തോല്‍വി വഴങ്ങേണ്ടി വന്നത്. ലിയോണ്‍ ബെയിലി (Leon Bailey) നേടിയ ഗോളാണ് ആസ്റ്റണ്‍ വില്ലയ്‌ക്ക് ജയമൊരുക്കിയത് (Aston Villa vs Manchester City Match Result).
സീസണില്‍ ആസ്റ്റണ്‍ വില്ലയുടെ പത്താം ജയമാണിത്. ഇതോടെ 32 പോയിന്‍റോടെ പോയിന്‍റ് പട്ടികയില്‍ മൂന്നാം സ്ഥാനത്തേക്ക് എത്താനും അവര്‍ക്ക് സാധിച്ചു. സീസണിലെ മൂന്നാം തോല്‍വി വഴങ്ങിയ സിറ്റി പോയിന്‍റ് പട്ടികയില്‍ നാലാം സ്ഥാനത്തേക്കും വീണിട്ടുണ്ട് (Premier League Points Table).
അവസാന മത്സരത്തില്‍ ടോട്ടന്‍ഹാമിനോട് സമനില വഴങ്ങിയ പെപ്പ് ഗ്വാര്‍ഡിയോളെയും സംഘവും വില്ല പാര്‍ക്കില്‍ ജയം മാത്രം മുന്നില്‍ കണ്ടാണ് പന്ത് തട്ടാനിറങ്ങിയത്. 3-2-4-1 ഫോര്‍മേഷനിലായിരുന്നു സിറ്റി പരിശീലകന്‍ താരങ്ങളെ അണിനിരത്തിയത്. മറുവശത്ത് 4-4-1-1 ഫോര്‍മേഷനിലായിരുന്നു ഉനായ് എമെറി (Unai Emery) തന്ത്രങ്ങള്‍ മെനഞ്ഞത്.
ജയിക്കാനുറച്ചിറങ്ങിയ സിറ്റിയെ തുടക്കം മുതല്‍ ഞെട്ടിക്കുന്ന പ്രകടനമാണ് ആസ്റ്റണ്‍ വില്ല തങ്ങളുടെ സ്വന്തം തട്ടകത്തില്‍ കാഴ്‌ചവെച്ചത്. ആദ്യ പത്ത് മിനിറ്റിനുള്ളില്‍ തന്നെ ആസ്റ്റണ്‍ വില്ല സിറ്റി ഗോള്‍മുഖത്ത് പ്രകമ്പനം തീര്‍ത്തു. എഡേര്‍സണിന്‍റെ മികവിലാണ് ഈ സമയങ്ങളില്‍ ഗോള്‍ വഴങ്ങാതെ അവര്‍ രക്ഷപ്പെട്ടത്.