ന്യൂഡല്‍ഹി: സ്വിസ് ഓപ്പൺ ബാഡ്‌മിന്‍റൺ ടൂര്‍ണമെന്‍റിന്‍റെ വനിത സിംഗിൾസ് കിരീടം നേടിയ ഇന്ത്യന്‍ താരം പിവി സിന്ധുവിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. ട്വിറ്ററിലൂടെയാണ് പ്രധാനമന്ത്രി സിന്ധുവിനെ അഭിനന്ദിച്ചത്. താരത്തിന്‍റെ നേട്ടങ്ങൾ ഇന്ത്യയിലെ യുവാക്കളെ പ്രചോദിപ്പിക്കുന്നാതണെന്ന് പ്രധാനമന്ത്രി പറഞ്ഞു.
''സ്വിസ് ഓപ്പൺ കിരീടം നേടിയ സിന്ധുവിന് അഭിനന്ദനങ്ങള്‍. അവളുടെ നേട്ടങ്ങൾ ഇന്ത്യയിലെ യുവാക്കളെ പ്രചോദിപ്പിക്കുന്നാതണ്. ഭാവി പ്രയത്നങ്ങൾക്ക് ആശംസകൾ'' പ്രധാനമന്ത്രി ട്വിറ്ററില്‍ കുറിച്ചു.
സ്വിസ് ഓപ്പണിന്‍റെ കലാശപ്പോരില്‍ തായ്‌ലൻഡ് താരം ബുസാനൻ ഒങ്ബാംറുങ്ഫാനെയാണ് സിന്ധു കീഴടക്കിയത്. 49 മിനിട്ട് നീണ്ടുനിന്ന മത്സരത്തില്‍ നേരിട്ടുള്ള സെറ്റുകൾക്കാണ് ഇന്ത്യന്‍ താരത്തിന്‍റെ ജയം. സ്‌കോർ: 21-16, 21-8.