ഹൈദരാബാദ് :കോമണ്‍വെല്‍ത്ത് ഗെയിംസില്‍ ഇന്ത്യക്കായി സ്വര്‍ണം നേടിയ ജെറമി ലാൽറിന്നുങ്കയ്‌ക്ക് അഭിനന്ദനപ്രവാഹം. രാഷ്‌ട്രപതി ദ്രൗപദി മുര്‍മു, പ്രധാനമന്ത്രി നരേന്ദ്ര മോദി, ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ ഉള്‍പ്പടെയുള്ള പ്രമുഖരാണ് ജെറമിയുടെ സുവര്‍ണനേട്ടത്തിന് പിന്നാലെ അഭിനന്ദനവുമായി രംഗത്തെത്തിയത്. ട്വിറ്ററിലൂടെയാണ് പ്രമുഖരുടെ പ്രതികരണം.
പുരുഷന്മാരുടെ 67 കിലോഗ്രാം ഭാരോദ്വഹനത്തിലാണ് പത്തൊന്‍പതുകാരനായ ജെറമി ലാൽറിന്നുങ്ക ഇന്ത്യയ്‌ക്കായി സ്വര്‍ണം നേടിയത്. മത്സരത്തിനിടെ പരിക്കേറ്റിട്ടും, നിങ്ങളുടെ ആത്മവിശ്വാസം ചരിത്രം സൃഷ്‌ടിക്കാനും ദശലക്ഷക്കണക്കിന് ആളുകളെ പ്രചോദിപ്പിക്കാനും പ്രാപ്‌തമാക്കി. ഈ വിജയം ഓരോ ഇന്ത്യക്കാര്‍ക്കും അഭിമാനമാണെന്നും രാഷ്‌ട്രപതി കുറിച്ചു.
നമ്മുടെ യുവതാരങ്ങള്‍ ചരിത്രം രചിക്കുന്നു. കോമണ്‍വെല്‍ത്ത് ഗെയിംസ് ഭാരോദ്വഹനത്തില്‍ സ്വര്‍ണം നേടിയ ജെറമി ലാൽറിന്നുങ്കയ്‌ക്ക് അഭിനന്ദനങ്ങള്‍. ചെറിയ പ്രായത്തില്‍ തന്നെ അദ്ദേഹം രാജ്യത്തിന്റെ അഭിമാനമായി. ഭാവിയിലും തിളങ്ങാനാവട്ടെ, എല്ലാവിധ ആശംസകളും എന്നായിരുന്നു പ്രധാനമന്ത്രിയുടെ ട്വീറ്റ്. ജെറമിയേയും ബിന്ധ്യറാണിയേയും അഭിനന്ദിച്ചാണ് ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ ട്വീറ്റ് രേഖപ്പെടുത്തിയത്.