ബാങ്കോക്‌: ഏഷ്യന്‍ കപ്പ് ടേബിൾ ടെന്നീസിന്‍റെ സെമി ഫൈനലിൽ കടക്കുന്ന ആദ്യ ഇന്ത്യൻ വനിതയായി മണിക ബത്ര. ചൈനീസ് തായ്‌പേയിയുടെ ലോക 23-ാം നമ്പർ താരം ചെന്‍ സൂ യൂവിനെ മൂന്നിനെതിരെ നാല് സെറ്റുകള്‍ക്കാണ് ലോക റാങ്കിംഗില്‍ 44-ാം സ്ഥാനത്തുള്ള മണിക ബത്ര തറപറ്റിച്ചത്. സ്‌കോർ: 6-11, 11-6, 11-5, 11-7, 8-11, 9-11, 11-9.
കൊറിയയുടെ ജിയോൺ ജിഹിയും ജപ്പാന്‍റെ മിമ ഇറ്റോയും തമ്മിലുള്ള മത്സരത്തിലെ വിജയിയെയാണ് മണിക സെമിയിൽ നേരിടുക. നേരത്തെ ആദ്യ റൗണ്ടിൽ ലോക ഏഴാം നമ്പർ താരം ചൈനയുടെ ചെന്‍ സിംഗ്‌ടോംഗിനെതിരെ അട്ടിമറി വിജയം നേടിയാണ് മണിക രണ്ടാം റൗണ്ടിലേക്ക് പ്രവേശിച്ചത്. മൂന്നിനെതിരെ നാല് സെറ്റുകൾക്കായിരുന്നു താരത്തിന്‍റെ വിജയം. സ്‌കോർ: 8-11, 11-9, 11-6, 11-6, 9-11, 8-11, 11-9.