മാഞ്ചസ്റ്റര്‍: നോര്‍വീജിയന്‍ യുവ സ്‌ട്രൈക്കര്‍ എര്‍ലിങ് ഹാലൻഡുമായുള്ള കരാര്‍ നടപടികള്‍ ഇംഗ്ലീഷ് വമ്പന്മാരായ മാഞ്ചസ്റ്റര്‍ സിറ്റി പൂര്‍ത്തിയാക്കി. 2027 ജൂലൈ ഒന്ന് വരെയുള്ള അഞ്ച് വര്‍ഷത്തെ കരാറാണ് ഹാലൻഡുമായി സിറ്റി ഒപ്പുവച്ചത്. 488 കോടി രൂപയാണ് ട്രാൻസ്‌ഫർ തുക.
തന്‍റെ സ്വപ്‌നങ്ങൾ സഫലമാക്കാൻ കഴിയുന്ന ക്ലബിലാണ് എത്തിച്ചേർന്നതെന്ന് കരാർ ഒപ്പുവച്ചതിന് പിന്നാലെ ഹാലൻഡ് പറഞ്ഞു. ടീമിനൊപ്പം സ്വയം മെച്ചപ്പെടാനും ഗോളുകള്‍ നേടാനും കിരീടങ്ങള്‍ നേടാനും കഴിയുമെന്ന ആത്മവിശ്വാസം തനിക്കുണ്ടെന്നും താരം വ്യക്തമാക്കി. ജൂലൈ ഒന്നിനാണ് ഹാലൻഡ് ഔദ്യോഗികമായി സിറ്റിയില്‍ ചേരുക.