മാഞ്ചസ്‌റ്റര്‍: ചാമ്പ്യന്‍സ് ലീഗ് യോഗ്യത നഷ്‌ടമായതിന് പിന്നാലെ താരങ്ങളുടെ പ്രതിഫലം വെട്ടിക്കുറയ്‌ക്കാനൊരുങ്ങി മാഞ്ചസ്‌റ്റര്‍ യുണൈറ്റഡ്. ക്രിസ്‌റ്റ്യാനോ റൊണാള്‍ഡോ ഉള്‍പ്പടെയുള്ള താരങ്ങളുടെ പ്രതിഫലം വെട്ടിക്കുറയ്‌ക്കാന്‍ ക്ലബ്ബ് തീരുമാനിച്ചിട്ടുണ്ടെന്നാണ് പുറത്ത് വരുന്ന റിപ്പോര്‍ട്ടുകള്‍. പ്രീമിയര്‍ ലീഗില്‍ ബ്രൈറ്റനോട് എതിരില്ലാത്ത നാല് ഗോളിന്‍റെ തോല്‍വി വഴങ്ങിയതാണ് മാനേജ്മെന്റിനെ ചൊടിപ്പിച്ചത്.
പ്രധാനതാരങ്ങളുമായി അംഗീകരിച്ച കരാറില്‍ നിന്ന് 25 ശതമാനം തുകയാണ് വെട്ടിക്കുറയ്‌ക്കാന്‍ ക്ലബ്ബ് ആലോചിക്കുന്നത്. ഈ നീക്കത്തിലൂടെ ടീം വിടുമെന്ന് അഭ്യൂഹങ്ങളുള്ള റൊണാൾഡോ അടുത്ത സീസണിലും ക്ലബിൽ തുടർന്നാൽ പ്രതിഫലം മൂന്നു ലക്ഷം പൗണ്ടായി മാറും. നിലവില്‍ ക്ലബ്ബ് 385000 പൗണ്ടാണ് ഒരാഴ്ച്ചയിൽ പ്രതിഫലമായി പോര്‍ച്ചുഗീസ് താരത്തിന് കൈമാറുന്നത്.