ലണ്ടന്‍:പ്രൊഫഷണൽ ടെന്നിസിൽ തന്‍റെ അവസാന മത്സരത്തിനിറങ്ങുകയാണ് സ്വിസ് ഇതിഹാസ താരം റോജർ ഫെഡറർ. ലേവർ കപ്പിൽ ടീം യൂറോപ്പിനായി റാഫേൽ നദാലിനൊപ്പമാണ് ഫെഡററുടെ വിടവാങ്ങൽ മത്സരം. അമേരിക്കൻ ജോഡിയായ ജാക്ക് സ്റ്റോക്ക്-ഫ്രാൻസിസ് തിയാഫോ എന്നിവര്‍ക്കെതിരായാണ് ഇതിഹാസ ജോഡി കളിക്കുന്നത്.
ഇരുവരേയും കൂടാതെ നൊവാക് ജോക്കോവിച്ച്, ആൻഡി മുറെ എന്നിവരും ടീം യൂറോപ്പിന്‍റെ ഭാഗമാണ്. ശനിയാഴ്‌ച(24.09.2022) പുലർച്ചെ 1 മണിക്കാണ് ഡബിള്‍സ്‌ മത്സരത്തിനായി ഫെഡററും നദാലും കളത്തിലിറങ്ങുക. ഈ മത്സരത്തിന് മുന്നോടിയായി ഒന്നിച്ച് പരിശീലനത്തിനിറങ്ങിയ ഇതിഹാസ താരങ്ങളുടെ വീഡിയോ സോഷ്യല്‍ മീഡിയ കീഴടക്കുകയാണ്.
നാല് പേരും ഒന്നിച്ചുള്ള ഒരു ചിത്രം നേരത്തെ തന്‍റെ ഔദ്യോഗിക അക്കൗണ്ടില്‍ ഫെഡറര്‍ പോസ്റ്റ് ചെയ്‌തിരുന്നു. രണ്ട് പതിറ്റാണ്ടുകളായി പുരുഷ ടെന്നിസ് അടക്കി വാഴുന്ന താരങ്ങളാണ് നൊവാക് ജോക്കോവിച്ച്, റാഫേൽ നദാൽ, റോജർ ഫെഡറർ, ആൻഡി മുറെ എന്നിവർ. 66 ഗ്രാൻഡ്സ്ലാം കിരീടങ്ങളാണ് നാല് പേരും ചേര്‍ന്ന് പങ്കിട്ടിട്ടുള്ളത്.