മാഡ്രിഡ് : സ്‌പാനിഷ് ലാ ലിഗയിൽ കരുത്തരായ റയൽ മാഡ്രിഡിന് തകപ്പൻ ജയം. വലൻസിയയെ ഒന്നിനെതിരെ നാല് ഗോളുകൾക്കാണ് റയൽ പരാജയപ്പെടുത്തിയത്. കരിം ബെന്‍സേമ, വിനീഷ്യസ് ജൂനിയര്‍ എന്നിവരുടെ ഇരട്ടഗോള്‍ പ്രകടനമാണ് റയലിന്‍റെ വിജയത്തിന് ചുക്കാൻ പിടിച്ചത്.
പതിഞ്ഞ താളത്തിൽ തുടങ്ങിയ മത്സരത്തിന്‍റെ 43-ാം മിനിട്ടിൽ പെനാൽറ്റിയിലൂടെ കരിം ബെന്‍സേമയാണ് റയലിനായി ആദ്യ ഗോൾ നേടിയത്. ഇതോടെ ഒരു ഗോളിന്‍റെ ലീഡുമായി മത്സരത്തിന്‍റെ ആദ്യ പകുതി അവസാനിച്ചു. രണ്ടാം പകുതിയിൽ ആക്രമണത്തോടെയാണ് റയൽ തുടങ്ങിയത്. 52-ാം മിനിട്ടിൽ വിനീഷ്യസ് ജൂനിയര്‍ റയലിന്‍റെ രണ്ടാം ഗോൾ നേടി. തൊട്ടുപിന്നാലെ 61-ാം മിനിട്ടിലും തകർപ്പനൊരു ഗോളിലൂടെ താരം വലൻസിയയെ ഞെട്ടിച്ചു.
ഇതോടെ മറുപടി ഗോളിനായി കിണഞ്ഞുശ്രമിച്ച വലൻസിയ 76-ാം മിനിട്ടിൽ ലക്ഷ്യം കണ്ടു. ഗോന്‍കാലോ ഗ്യൂഡ്‌സിന്‍റെ വകയായിരുന്നു ഗോൾ. എന്നാൽ 88-ാം മിനിട്ടിൽ കരിം ബെന്‍സേമ തന്‍റെ രണ്ടാമത്തെ ഗോളും നേടി മത്സരം കൈപ്പിടിയിലൊതുക്കി.
വിജയത്തോടെ ലീഗില്‍ രണ്ടാം സ്ഥാനത്തുള്ള സെവിയ്യയുമായി ഒന്നാം സ്ഥാനത്തുള്ള റയലിന്‍റെ പോയിന്‍റ് വ്യത്യാസം എട്ടായി മാറി. 21 മത്സരങ്ങളിൽ നിന്ന് 49 പോയിന്‍റാണ് റയലിനുള്ളത്. 19 മത്സരങ്ങളില്‍നിന്ന് 41 പോയിന്‍റാണ് സെവ്വിയക്കുള്ളത്. 28 പോയിന്‍റുമായി ഒൻപതാം സ്ഥാനത്താണ് വലൻസിയ.