വലൻസിയ: ലാ ലിഗയിൽ വലൻസിയക്കെതിരെ തകർപ്പൻ ജയവുമായി ബാഴ്‌സലോണ. ഒന്നിനെതിരെ നാലു ഗോളുകൾക്കാണ് ബാഴ്‌സലോണ ജയം കണ്ടത്. ജയത്തോടെ അത്ലറ്റികോ മാഡ്രിഡിനെ മറികടന്ന ബാഴ്‌സലോണ ആദ്യ നാലിൽ തിരിച്ചെത്തി.
ബാഴ്‌സലോണക്കായി ആദ്യ ഹാട്രിക്കുമായി കളം നിറഞ്ഞ ഗാബോൺ താരം ഒബമയാങാണ് അവർക്ക് വലിയ ജയം സമ്മാനിച്ചത്. ജനുവരി ട്രാൻസ്‌ഫറിൽ ആഴ്‌സണലിൽ നിന്നു എത്തിയ ഒബമയാങിന്‍റെ സൂപ്പർ പ്രകടനമായിരുന്നു കളിയുടെ സവിശേഷത. 23-ാം മിനിറ്റിൽ ജോർദി ആൽബയുടെ ലോങ് ബോൾ സ്വീകരിച്ച ഒബമയാങ് തന്‍റെ ആദ്യ ഗോൾ നേടി.
ALSO READ:പ്രീമിയർ ലീഗ് | ലീഡ്‌സിന്‍റെ പോരാട്ടവീര്യം മറികടന്ന യുണൈറ്റഡ്, ജയം രണ്ടിനെതിരെ നാലു ഗോളിന്
ഒമ്പതു മിനിറ്റികൾക്കു ശേഷം ഡെംമ്പലെയുടെ പാസിൽ നിന്നു ഫ്രാങ്കി ഡി ജോങ് ലീഡ് ഇരട്ടിയാക്കി. 38-ാം മിനിറ്റിൽ ഗാവിയുടെ പാസിൽ നിന്നു ഒബമയാങ് തന്‍റെ രണ്ടാം ഗോൾ സ്വന്തമാക്കി. 63-ാം മിനിറ്റിൽ ബോക്‌സിന് പുറത്ത് നിന്ന് ഉഗ്രൻ ഷോട്ടിലൂടെ ഗോൾ കണ്ടത്തിയ ഒബമയാങ് ബാഴ്‌സലോണയുടെ ജയം പൂർത്തിയാക്കി.
52-ാം മിനിറ്റിൽ ബ്രയാൻ ഗില്ലിന്‍റെ ക്രോസിൽ നിന്നു ഹെഡറിലൂടെ കാർലോസ് സോളറാണ് വലൻസിയയുടെ ആശ്വാസ ഗോൾ കണ്ടെത്തിയത്.