ബാഴ്‌സലോണ:ലാ ലിഗയില്‍ (La Liga) സീസണിലെ ആദ്യ എല്‍ ക്ലാസിക്കോ (El Clasico) പോരാട്ടത്തില്‍ ബാഴ്‌സലോണയെ തകര്‍ത്ത് റയല്‍ മാഡ്രിഡ് (Barcelona vs Real Madrid). ബാഴ്‌സയുടെ തട്ടകമായ ലൂയിസ് കമ്പനിസ് ഒളിമ്പിക് സ്റ്റേഡിയത്തില്‍ നടന്ന തകര്‍പ്പന്‍ മത്സരത്തില്‍ ഒന്നിനെതിരെ രണ്ട് ഗോളുകള്‍ക്കാണ് ലോസ് ബ്ലാങ്കോസിന്‍റെ വിജയം. കരിയറിലെ ആദ്യ എല്‍ ക്ലാസിക്കോ പോരില്‍ ഇരട്ടഗോളടിച്ച താരം ജൂഡ് ബെല്ലിങ്‌ഹാമാണ് (Jude Bellingham) റയലിന് ജയമൊരുക്കിയത്.
ആദ്യ പകുതിയില്‍ ഇൽകെ ഗുണ്ടോഗൻ (İlkay Gündoğan) നേടിയ ഗോളില്‍ പിന്നിട്ട് നിന്ന ശേഷമായിരുന്നു മത്സരത്തില്‍ റയല്‍ മാഡ്രിഡിന്‍റെ തിരിച്ചുവരവ്. ജയത്തോടെ ലാ ലിഗ പോയിന്‍റ് പട്ടികയില്‍ 28 പോയിന്‍റുമായി ഒന്നാം സ്ഥാനത്തേക്ക് എത്താനും റയല്‍ മാഡ്രിഡിനായി. പോയിന്‍റ് പട്ടികയില്‍ മൂന്നാം സ്ഥാനത്താണ് ബാഴ്‌സലോണയിപ്പോള്‍.
ലൂയിസ് കമ്പനിസ് ഒളിമ്പിക് സ്റ്റേഡിയം വേദിയായ വീറും വാശിയും നിറഞ്ഞ എല്‍ ക്ലാസിക്കോ പോരാട്ടത്തില്‍ ആദ്യ പത്ത് മിനിറ്റിനുള്ളില്‍ തന്നെ ലീഡ് പിടിക്കാന്‍ ആതിഥേയരായ ബാഴ്‌സലോണയ്‌ക്ക് സാധിച്ചിരുന്നു. ആറാം മിനിറ്റില്‍ ഗുണ്ടോഗന്‍റെ വകയായിരുന്നു ബാഴ്‌സയുടെ ഗോള്‍. മുന്‍ മാഞ്ചസ്റ്റര്‍ സിറ്റി താരമായ ഗുണ്ടോഗന്‍ ബാഴ്‌സയ്‌ക്കായി നേടുന്ന ആദ്യത്തെ ഗോളായിരുന്നു ഇത്.