പനജി: ഈ സീസണിൽ കേരള ബ്ലാസ്റ്റേഴ്‌സിന്‍റെ മികച്ച പ്രകടനത്തിനു പിന്നിലെ ബുദ്ധികേന്ദ്രമായ കോച്ച് ഇവാൻ വുകോമനോവിച്ച് അടുത്ത സീസണിലും ക്ലബിനൊപ്പം തുടരും. ഒരു വർഷത്തെ കരാറിലാണ് ഇവാൻ വുകോമനോവിച്ച് കേരള ബ്ലാസ്റ്റേഴ്‌സിലേക്ക് എത്തിയത്. എന്നാൽ ടീമിന്‍റെ മികച്ച പ്രകടനം പരിഗണിച്ച് അടുത്ത സീസണിലും അദ്ദേഹത്തെ നിലനിർത്തുമെന്ന് ബ്ലാസ്റ്റേഴ്‌സ് അധികൃതർ അറിയിച്ചു.
'കേരള ബ്ലാസ്റ്റേഴ്‌സ് പരിശീലകനായി ഇവാൻ വുകോമനോവിച്ച് അടുത്ത സീസണിലും തുടരും. അദ്ദേഹത്തിന്‍റെ കരാറിൽ ടീമിന്‍റെ പ്രകടനം അടിസ്ഥാനമാക്കി ചില ഉടമ്പടികളുണ്ട്. അതിൽ എത്തിക്കഴിഞ്ഞാൽ സ്വാഭാവികമായും കരാർ പുതുക്കും'. മറ്റുള്ള ക്ലബുകളിൽ നിന്നുള്ള ഓഫറുകൾ ഒഴിവാക്കാൻ സെർബിയൻ പരിശീലകനുമായി ദീർഘകാല കരാർ ഒപ്പിടാനും നീക്കമുണ്ടെന്നും അവർ പറഞ്ഞു.