''അതന്യായം, എനിക്ക് ഫൈനൽ കളിക്കാമായിരുന്നു''; സെമി തോല്‍വിയില്‍ തുറന്നടിച്ച് സിന്ധു

ടൂര്‍ണമെന്‍റിന്‍റെ സെമിയില്‍ ജപ്പാന്‍റെ ലോക രണ്ടാം നമ്പർ താരം അകാനെ യമാഗുച്ചിയോട് കീഴടങ്ങിയ സിന്ധുവിന് വെങ്കലം കൊണ്ട് തൃപ്‌തിപ്പെടേണ്ടി വന്നിരുന്നു.

മനില (ഫിലിപ്പീൻസ്): ബാഡ്‌മിന്‍റണ്‍ ഏഷ്യ ചാമ്പ്യന്‍ഷിപ്പിലെ (ബിഎസി) സെമി ഫൈനല്‍ തോല്‍വിയില്‍ അതൃപ്തി പ്രകടിപ്പിച്ച് ഇന്ത്യയുടെ ഒളിമ്പിക് മെഡല്‍ ജേതാവ് പിവി സിന്ധു. മത്സരത്തില്‍ ജപ്പാന്‍റെ ലോക രണ്ടാം നമ്പർ താരം അകാനെ യമാഗുച്ചിയോട് കീഴടങ്ങിയ താരത്തിന് വെങ്കലം കൊണ്ട് തൃപ്‌തിപ്പെടേണ്ടി വന്നിരുന്നു. എന്നാല്‍ തന്‍റെ തോല്‍വി അമ്പയർമാരുടെ തെറ്റായ തീരുമാനത്തിനാലാണെന്ന് സിന്ധു പറഞ്ഞു.

മത്സരത്തില്‍ ഒന്നിനെതിരെ രണ്ട് സെറ്റുകള്‍ക്കായിരുന്നു സിന്ധുവിന്‍റെ തോല്‍വി. ആദ്യ സെറ്റ് 21-13ന് അനായാസം സ്വന്തമാക്കാന്‍ സിന്ധുവിന് കഴിഞ്ഞിരുന്നു. രണ്ടാം സെറ്റില്‍ 14-11ന് മുന്നിലെത്തിയ സിന്ധുവിന് ഒരു പോയിന്‍റ് പെനാൽറ്റി ലഭിച്ചിരുന്നു. സെർവ് ചെയ്യാൻ കൂടുതൽ സമയം എടുത്തതിനാണ് താരത്തിന് പെനാല്‍റ്റി ലഭിച്ചത്.

ഇതിന് പിന്നാലെ താളം നഷ്‌ടമായ സിന്ധു ഈ സെറ്റ് 19-21ന് കൈവിട്ടു. തുടര്‍ന്ന് കുതിപ്പ് ലഭിച്ച ജപ്പാന്‍ താരം മൂന്നാം സെറ്റ് 16-21ന് പിടിച്ചതോടെ മത്സരവും സ്വന്തമാക്കി. സ്‌കോർ 21-13, 19-21, 16-21. ഇതോടെ ചാമ്പ്യന്‍ഷിപ്പില്‍ ആദ്യ സ്വര്‍ണമെന്ന സിന്ധുവിന്‍റെ മോഹങ്ങളും തകര്‍ന്നു.

ഒരുപക്ഷേ ഞാൻ വിജയിച്ചേനെ:"നിങ്ങൾ ഒരുപാട് സമയമെടുക്കുന്നുണ്ടെന്ന് അമ്പയർ എന്നോട് പറഞ്ഞു, പക്ഷേ എതിരാളി ആ സമയത്ത് തയ്യാറായിരുന്നില്ല. എന്നാല്‍ അമ്പയർ പെട്ടെന്ന് അവൾക്ക് പോയിന്‍റ് നൽകി, അത് ശരിക്കും അന്യായമായിരുന്നു. ഞാൻ തോൽക്കാനുള്ള കാരണങ്ങളിലൊന്നാണത്.

ശരിക്കും എനിക്ക് അതാണ് തോന്നുന്നത്. ആ സമയം ഞാന്‍ 14-11 മുന്നിലായിരുന്നു, അത് 15-11 ആയി മാറാമായിരുന്നു, പകരം അത് 14-12 ആയി മാറി, അവൾ തുടർച്ചയായി പോയിന്‍റുകൾ എടുത്തു. അമ്പയറുടെ തീരുമാനം വളരെ അന്യായമായാണ് ഞാൻ കരുതുന്നത്. ഒരുപക്ഷേ ഞാൻ വിജയിച്ചേനെ. ടൂര്‍ണമെന്‍റില്‍ ഫൈനലും കളിച്ചേനെ" ശനിയാഴ്ചത്തെ മത്സരത്തിന് ശേഷം സിന്ധു പറഞ്ഞു.

എന്താണ് തെറ്റ്?:റഫറിയുടെ തീരുമാനം നിരാശാജനകമായിരുന്നുവെന്ന് സിന്ധുവിന്‍റെ പിതാവ് പിവി രമണയും വ്യക്തമാക്കി. ചീഫ്‌ റഫറിയോട് സംസാരിച്ചപ്പോള്‍ എല്ലാം ചെയ്‌തു കഴിഞ്ഞുവെന്നാണ് അദ്ദേഹം പറഞ്ഞത്. എന്നാല്‍ ഒരു ചീഫ്‌ റഫറിയെന്ന നിലയില്‍ തീരുമാനമെടുക്കും മുമ്പ് എന്താണ് തെറ്റെന്ന് അവര്‍ ഉറപ്പാക്കേണ്ടതുണ്ടായിരുന്നു.

ചുരുങ്ങിയ പക്ഷം അദ്ദേഹം റീപ്ലേ കണ്ടെങ്കിലും അതില്‍ തീരുമാനമെടുക്കണമായിരുന്നുവെന്നും രമണ പറഞ്ഞു. ശിക്ഷ വിധിക്കും മുമ്പ് അമ്പയര്‍ മുന്നറിയിപ്പ് നല്‍കിയിരുന്നില്ലെന്നും അദ്ദേഹം ചൂണ്ടിക്കാട്ടി.

“അമ്പയർ ചെയ്തത് ശരിയായില്ല, അവൾ വൈകിയാൽ, നിങ്ങൾക്ക് അവളെ മഞ്ഞ കാർഡ് ഉപയോഗിച്ച് മുന്നറിയിപ്പ് നൽകാമായിരുന്നു, നിങ്ങൾ അവളെ ഒരു പോയിന്റ് കൊണ്ട് ശിക്ഷിക്കുന്നുണ്ടെങ്കിൽ കുറഞ്ഞത് ചുവപ്പ് കാർഡെങ്കിലും കാണിക്കണമായിരുന്നു. പക്ഷേ അങ്ങനെയൊന്നും ഉണ്ടായിരുന്നില്ല." അദ്ദേഹം വ്യക്തമാക്കി.