കൊൽക്കത്ത: ഇന്ത്യൻ സൂപ്പർ ലീഗിൽ (Indian Super League - ISL) വിജയകുത്തിപ്പ് തുടർന്ന് കേരള ബ്ലാസ്റ്റേഴ്‌സ് (Kerala Blasters). സീസണിലെ 12-ആം റൗണ്ട് മത്സരത്തിൽ മോഹൻ ബഗാൻ സൂപ്പർ ജയന്‍റിനെ (Mohun Bagan Super Giant) എതിരില്ലാത്ത ഒരു ഗോളിനാണ് ബ്ലാസ്റ്റേഴ്‌സ് തകർത്തത്. ദിമിത്രിയോസ് ഡയമെന്‍റക്കോസ് (Dimitrios Diamentakos) ആണ് ഗോൾ സ്കോർ.
ബ്ലാസ്റ്റേഴ്‌സിന്‍റെ തുടർച്ചയായ മൂന്നാമത്തെയും സീസണിലെ എട്ടാമത്തെയും മോഹന്‍ ബഗാനെതിരായ ചരിത്രത്തിലെ ആദ്യത്തെയും ജയമാണിത്. ഇതോടെ 26 പോയിന്‍റുമായി ഐഎസ്എൽ പോയിന്‍റ് പട്ടികയിൽ ഒന്നാം സ്ഥാനം സ്വന്തമാക്കാനും കേരളാ ബ്ലാസ്റ്റേഴ്‌സിനായി (ISL Points Table).
ബഗാനെതിരെ അവരുടെ തട്ടകത്തില്‍ മത്സരത്തിലുടനീളം നിറഞ്ഞുകളിച്ചത് ബ്ലാസ്റ്റേഴ്‌സാണ്. തുടക്കം മുതല്‍ക്ക് തന്നെ ബ്ലാസ്റ്റേഴങ്‌സ് ആതിഥേയരെ വിറപ്പിച്ചു. രണ്ടാം മിനിറ്റില്‍ ഡാനിഷ് ഫറൂഖ് (Danish Farooq) ആദ്യ ഗോള്‍ ശ്രമം നടത്തി. നാലാം മിനിറ്റില്‍ ഡയമെന്‍റക്കോസിന്‍റെ ഷോട്ട് ക്രോസ് ബാറില്‍ ഇടിച്ചു പോയി.
തുടരെയുള്ള ആക്രമണങ്ങള്‍ക്കൊടുവില്‍ മത്സരത്തിന്‍റെ 9-ാം മിനിറ്റില്‍ ഡയമെന്‍റക്കോസ് തന്നെ ബ്ലാസ്റ്റേഴ്‌സിനായി ലക്ഷ്യം കണ്ടു. സീസണിലെ ദിമിത്രിയോസ് ഡയമെന്‍റക്കോസ് നേടുന്ന ഏഴാമത്തെ ഗോളായിരുന്നു ഇത്. ഈ ഗോളോടെ സീസണിലെ ഗോള്‍ വേട്ടക്കാരുടെ പട്ടികയില്‍ മുംബൈ സിറ്റി എഫ്‌സിയുടെ പെരേര ഡയസിനെ (Jorge Pereyra Diaz) പിന്നിലാക്കി ഒന്നാം സ്ഥാനത്തെത്താനും ഡയമെന്‍റക്കോസിനായി (ISL Top Goal Scorer 2023-24).