പനജി : ഐ എസ് എല്ലിൽ കേരള ബ്ലാസ്റ്റേഴ്‌സിന് കനത്ത പരാജയം. ഇന്ന് ജംഷഡ്‌പൂരിനോട് എതിരില്ലാത്ത മൂന്ന് ഗോളുകളുടെ പരാജയമാണ് കേരള ബ്ലാസ്റ്റേഴ്‌സ് ഏറ്റുവാങ്ങിയത്. ആദ്യ പകുതിയിലും രണ്ടാം പകുതിയിലുമായി ഗ്രെഗ് സ്റ്റുവര്‍ട്ട് നേടിയ രണ്ട് പെനാല്‍റ്റി ഗോളുകളും രണ്ടാം പകുതിയില്‍ ഡാനിയേല്‍ ചുക്‌വു നേടിയ ഗോളുമാണ് ജംഷഡ്‌പൂരിന് ജയമൊരുക്കിയത്.
ഇന്ന് ആദ്യ പകുതിയിൽ രണ്ട് ടീമുകൾക്കും കാര്യമായി അവസരങ്ങൾ സൃഷ്‌ടിക്കാനായില്ല. നാല് മാറ്റങ്ങളോടെ ഇറങ്ങിയത് കൊണ്ട് തന്നെ കേരള ബ്ലാസ്റ്റേഴ്‌സിന് പതിവ് താളം ലഭിച്ചില്ല. 44-ാം മിനുട്ടിൽ ധനചന്ദ്രെ ഗ്രെഗ് സ്റ്റുവർട്ടിനെ വീഴ്ത്തിയതിന് ജംഷഡ്‌പൂരിന് പെനാല്‍റ്റി ലഭിച്ചു. സ്റ്റുവർട്ട് തന്നെ ആ പെനാല്‍റ്റി ലക്ഷ്യത്തിൽ എത്തിച്ചു.
രണ്ടാം പകുതിയിൽ കേരള ബ്ലാസ്റ്റേഴ്‌സിന് കളിയിലേക്ക് തിരികെ വരാൻ ആകും മുമ്പ് വിവാദ പെനല്‍റ്റിയിലൂടെ റഫറി ജംഷഡ്‌പൂരിന് രണ്ടാം ഗോള്‍ സമ്മാനിക്കുകയായിരുന്നു. ഇത്തവണ ലെസ്കോവിചിന്‍റെ ഒരു ടാക്കിൾ ആണ് പെനാല്‍റ്റിയിൽ കലാശിച്ചത്. ഈ പെനാല്‍റ്റി ഒരു പനേങ്ക കിക്കിലൂടെ ലക്ഷ്യത്തിൽ എത്തിച്ച സ്റ്റുവർട്ട് ലീഡ് ഇരട്ടിയാക്കി.