പനാജി : ഐഎസ്‌എല്ലില്‍ വ്യാഴാഴ്‌ച നടന്ന മത്സരത്തില്‍ മുംബൈ സിറ്റി എഫ്‌സിക്കെതിരെ ജംഷഡ്‌പൂര്‍ എഫ്‌സിക്ക് ജയം. മൂന്ന് പെനാല്‍റ്റി കിക്കുകള്‍ കണ്ട മത്സരത്തില്‍ രണ്ടിനെതിരെ മൂന്ന് ഗോളുകള്‍ക്കാണ് മുംബൈയെ ജംഷഡ്‌പൂര്‍ വീഴ്‌ത്തിയത്. ജംഷഡ്‌പൂരിനായി ഗ്രെഗ് സ്റ്റുവര്‍ട്ട് ഇരട്ട ഗോള്‍ നേട്ടം ആഘോഷിച്ചു.
മത്സരത്തിന്‍റെ ഒമ്പതാം മിനിട്ടില്‍ തന്നെ ഗ്രെഗ് സ്റ്റുവര്‍ട്ടിലൂടെ മുന്നിലെത്താന്‍ ജംഷഡ്‌പൂരിനായിരുന്നു. തുടര്‍ന്ന് 30ാം മിനിട്ടില്‍ റിത്വിക് ദാസും ലക്ഷ്യം കണ്ടതോടെ സംഘം ലീഡുയര്‍ത്തി.
എന്നാല്‍ രണ്ടാം പകുതിയുടെ 57ാം മിനിട്ടില്‍ രാഹുല്‍ ബെക്കെയും 86ാം മിനിട്ടില്‍ ഡിയാഗോ മൗറിഷ്യയോയും (പെനാല്‍റ്റി) ഗോള്‍ നേടിയതോടെ ഒപ്പം പിടിക്കാന്‍ മുംബൈയ്‌ക്കായി.തുടര്‍ന്ന് 94ാം മിനിട്ടില്‍ ലഭിച്ച പെനാല്‍റ്റി വലയിലെത്തിച്ച് ഗ്രെഗ് സ്റ്റുവര്‍ട്ട് മത്സരം ജംഷഡ്‌പൂരിനൊപ്പം നിര്‍ത്തി.