ഫത്തോർഡ: ഇന്ത്യൻ സൂപ്പർ ലീഗിൽ ഇന്നലെ നടന്ന മത്സരത്തിൽ ദുർബലരായ നോർത്ത് ഈസ്റ്റ് യുണൈറ്റഡിനെതിരെ തകർപ്പൻ വിജയം സ്വന്തമാക്കി എടികെ മോഹൻ ബഗാൻ. ഒന്നിനെതിരെ മൂന്ന് ഗോളുകൾക്കായിരുന്നു എടികെയുടെ വിജയം. വിജയത്തോടെ പോയിന്‍റ് പട്ടികയിൽ ജംഷദ്‌പൂരിനെ മറികടന്ന് എടികെ രണ്ടാം സ്ഥാനത്തേക്ക് കുതിച്ചു.
മത്സരത്തിൽ പന്തടക്കത്തിലും, പാസുകളിലും മോഹൻ ബഗാന് തന്നെയായിരുന്നു മുൻതൂക്കം. എന്നാൽ മത്സരത്തിൽ ആദ്യ ഗോൾ സ്വന്തമാക്കിയത് നോർത്ത് ഈസ്റ്റ് ആയിരുന്നു. 17-ാം മിനിട്ടിൽ വിപി സുഹൈറിലൂടെയാണ് നോർത്ത് ഈസ്റ്റ് ലീഡ് നേടിയത്.
എന്നാൽ നോർത്ത് ഈസ്റ്റിന്‍റെ ആഘോഷങ്ങൾക്ക് വലിയ ആയുസ് ഉണ്ടായിരുന്നില്ല. 22-ാം മിനിട്ടിൽ ജോണി കൗകോയിലൂടെ മോഹൻ ബഗാൻ തിരിച്ചടിച്ചു. തുടർന്ന് ആദ്യ പകുതി അവസാനിക്കാൻ സെക്കന്‍റുകൾ ബാക്കി നിൽക്കെ 45-ാം മിനിട്ടിൽ ലിസ്റ്റൻ കൊളാസോയിലൂടെ എടികെ രണ്ടാം ഗോളും ലീഡും നേടി.
ALSO READ:ലമ്പാർഡിന് കീഴിൽ എവർട്ടണ് ലീഗിലെ ആദ്യ വിജയം
രണ്ടാം പകുതിയുടെ തുടക്കത്തിൽ തന്നെ മോഹൻ ബഗാൻ മൂന്നാം ഗോളും നേടി. 52-ാം മിനിട്ടിൽ മൻവീർ സിങിലൂടെയായിരുന്നു ഗോൾ നേട്ടം. വിജയത്തോടെ മോഹൻ ബഗാന് 14 മത്സരങ്ങളിൽ നിന്ന് 26 പോയിന്‍റ് ലഭിച്ചു. 17 മത്സരങ്ങളിൽ നിന്ന് 10 പോയിന്‍റ് മാത്രമുള്ള നോർത്ത് ഈസ്റ്റ് യുണൈറ്റഡ് പട്ടികയിൽ അവസാന സ്ഥാനത്താണ്.