ഡൽഹി : വനിത ഹോക്കി ലോകകപ്പിനുള്ള ഇന്ത്യന്‍ ടീമിനെ പ്രഖ്യാപിച്ചു. അടുത്ത മാസം ഒന്നുമുതല്‍ 17വരെ നെതര്‍ലാന്‍ഡിലും സ്പെയിനിലുമായാണ് ലോകകപ്പ്. ഹോക്കി ഇന്ത്യ ഇന്ന് പ്രഖ്യാപിച്ച 18 അംഗ ടീമിനെ ഗോൾകീപ്പർ സവിത പുനിയ നയിക്കും.
ടോക്കിയോ ഒളിമ്പിക്‌സിൽ ഇന്ത്യയെ നയിച്ച റാണി രാംപാല്‍ ലോകകപ്പ് ടീമിൽ ഇടം നേടിയില്ല. പരിക്കില്‍ നിന്ന് മോചിതയായി പൂര്‍ണ കായികക്ഷമത വീണ്ടെടുത്തിട്ടില്ലാത്തതിനാലാണ് റാണി രാംപാലിനെ ഒഴിവാക്കിയത്. റാണിയൊഴികെ ഒളിമ്പിക്‌സിന്‍റെ ഭാഗമായ താരങ്ങളെല്ലാം ടീമിൽ ഇടം പിടിച്ചു.
ഗോള്‍ കീപ്പറായ സവിതയ്ക്ക് പുറമെ ബിച്ചു ദേവി ഖാരിബവും ടീമിലുണ്ട്. പ്രതിരോധനിരയില്‍ ദീപ് ഗ്രേസ് എക്ക, ഗുര്‍ജിത് കൗര്‍, നിക്കി പ്രഥാന്‍, ഉദിത എന്നിവരാണുള്ളത്. മധ്യനിരയില്‍ നിഷ, സുശീല ചാനു, മോണിക്ക, നേഹ, ജ്യോതി, നവജ്യോത് കൗര്‍, സോണിക, സലീമ ടിറ്റെ എന്നിവര്‍ ഇടം നേടി.