ലണ്ടന്‍: പ്രശസ്‌തമായ ലോർഡ്‌സ് ക്രിക്കറ്റ് മൈതാനത്ത് ബാറ്റുമായി കളിക്കാനിറങ്ങി ഇംഗ്ലണ്ട് ഫുട്‌ബോള്‍ ടീം നായകന്‍ ഹാരി കെയ്‌ന്‍. ദി ഹൺഡ്രഡ് ടൂർണമെന്‍റിന്‍റെ ഭാഗമായുള്ള സിക്‌സ് ഹിറ്റിങ് ചാലഞ്ചിലാണ് കെയ്‌ന്‍ പങ്കെടുത്തത്. ഫുള്‍ ടോസ് ബോളുകളില്‍ വമ്പന്‍ ഷോട്ടുകള്‍ കളിക്കുന്ന ഇംഗ്ലീഷ് നായകന്‍റെ വീഡിയോ ദി ഹൺഡ്രഡ് പങ്കുവച്ചിട്ടുണ്ട്.
തുടര്‍ന്ന് മുൻ ഇന്ത്യൻ പരിശീലകന്‍ രവി ശാസ്‌ത്രിയോടൊപ്പം കമന്‍ററിയിലും ഒരു കൈനോക്കുന്ന കെയ്‌നെയും വീഡിയോയില്‍ കാണാം. ഇംഗ്ലീഷ് ക്ലബ് ടോട്ടനത്തില്‍ സഹതാരമായ മാറ്റ് ഡോഹെർട്ടിയും കെയ്‌നൊപ്പമുണ്ടായിരുന്നു. ലണ്ടൻ സ്‌പിരിറ്റും മാഞ്ചസ്റ്റർ ഒറിജിനൽസും തമ്മിലുള്ള മത്സരത്തിന് മുന്നോടിയായാണ് സിക്‌സ് ഹിറ്റിങ് ചാലഞ്ച് നടന്നത്.
വെസ്റ്റ് ഇന്‍ഡീസ് ക്രിക്കറ്റ് ടീം മുന്‍ നായകൻ കീറോണ്‍ പൊള്ളാര്‍ഡ് തന്‍റെ ടി20 കരിയറില്‍ കളിക്കുന്ന 600-ാം മത്സരമായിരുന്നു ഇത്. ടി20 ക്രിക്കറ്റില്‍ ആദ്യമായാണ് ഒരു താരം 600 മത്സരങ്ങള്‍ എന്ന നേട്ടം സ്വന്തമാക്കുന്നത്. വിന്‍ഡീസ് ദേശീയ ടീമിനായും ഫ്രാഞ്ചൈസി ക്രിക്കറ്റില്‍ വിവിധ ടീമുകള്‍ക്കായും കളിച്ചാണ് താരം നിര്‍ണായക നാഴികകല്ല് പിന്നിട്ടത്.