കെയ്‌റോ: ഫോര്‍മുല വണ്‍ റേസ് ട്രാക്കിലെ ഇതിഹാസം മൈക്കള്‍ ഷുമാക്കറിന്‍റെ റെക്കോഡിനൊപ്പം ലൂയിസ് ഹാമില്‍ട്ടണ്‍. ഏഴ്‌ ചാമ്പ്യന്‍ഷിപ്പുകളെന്ന ഷുമാക്കറിന്‍റെ നേട്ടമാണ് ഞായാറാഴ്‌ച തുര്‍ക്കിയിലെ മഴയില്‍ നനഞ്ഞ ഇസ്‌താംബുള്‍ സര്‍ക്യൂട്ടില്‍ ഒന്നാമതെത്തി ഹാമില്‍ട്ടണ്‍ സ്വന്തം പേരില്‍ ചേര്‍ത്തത്. 31 സെക്കൻഡിന്‍റെ ലീഡോടെ ആധികാരിക ജയമാണ് ഹാമില്‍ട്ടണ്‍ സ്വന്തമാക്കിയത്. മഴ നിറഞ്ഞ് വഴുതിയ ട്രാക്കില്‍ പലരും ഏറെ പ്രയാസപ്പെട്ട് മുന്നേറുമ്പോഴാണ് ഹാമില്‍ട്ടണിന്‍റെ ചരിത്ര നേട്ടം. ഫോര്‍മുല വണ്‍ സര്‍ക്യൂട്ടിലെ 94ാമത്തെ ഗ്രാന്‍പ്രീ നേട്ടമാണ് ഹാമില്‍ട്ടണ്‍ തുര്‍ക്കിയില്‍ സ്വന്തമാക്കിയത്. ഇസ്‌താംബുളിലെ നനഞ്ഞതും പരിചയം കുറഞ്ഞതുമായി സര്‍ക്യൂട്ടില്‍ ഏറെ കരുതലോടെയായിരുന്നു ഹാമില്‍ട്ടണിന്‍റെ മുന്നേറ്റം. സെര്‍ജിയോ പെരസ് രണ്ടാം സ്ഥാനത്തും സെബാസ്റ്റ്യന്‍ വെറ്റല്‍ മൂന്നാം സ്ഥാനത്തും ഫിനിഷ്‌ ചെയ്‌തു.
ഹാമില്‍ട്ടണ്‍ നേട്ടം കൊയ്യുമ്പോഴും ഇതിഹാസം ഷുമാക്കറിന്‍റെ ഓര്‍മകളിലായിരുന്നു ഫോര്‍മുല വണ്‍ പ്രേമികള്‍. ഏഴ്‌ വര്‍ഷം മുമ്പ് ആല്‍പ്സ്‌ പര്‍വത നിരകളില്‍ വെച്ചുണ്ടായ അപകടത്തില്‍ നിന്നും സാധാരണ ജീവിതത്തിലേക്ക് മടങ്ങിവരാന്‍ ഷുമാക്കര്‍ക്ക് ഇതേവരെ സാധിച്ചിട്ടില്ല. 16 വര്‍ഷം മുമ്പ് ബെല്‍ജിയത്തില്‍ വെച്ചാണ് ഷുമാക്കര്‍ തന്‍റെ ഏഴാമത്തെ ചാമ്പ്യന്‍ഷിപ്പ് സ്വന്തമാക്കിയത്.